kuchh lafz the

kis qadar kamzor hai merā vajūd

kis qadar be-mehr hai duniyā mirī

kis qadar be-ant hai ḳhvāboñ kī dhund

jab nikaltā huuñ sahar-dam shahr meñ

koī shai detī nahīñ apnā patā

bhūlne lagtā huuñ apnā naam tak

dhuup meñ uḌte hue phūloñ ke rang

shāḳh par mahv-e-suḳhan chiḌiyoñ ke ġhol

aa.ine zar se sitāre vasvase

sab ne pahnā ajnabiyyat kā libās

miT ga.ī pahchān ḳhūn-o-zisht kī

uḌ ga.ī miTTī se āb-o-tāb-e-shab

ruk ga.ī ik moḌ par fasl-e-nabāt

kho ga.e mujh se achānak mere lafz

lafz haañ kuchh lafz the jin ke liye

muztarib rahte the mere jism-o-jāñ

sarsarāte the lahū meñ shesh-nāg

jam.a hotī thī mire siine meñ aag

jis ke pahlū meñ kabhī ḳhvābīda the

ḳhvāb-o-ḳhushbū se mahakte ḳhāna-e-bāġh

jin meñ lau dete the us ke surḳh hoñT

aur mirī āñkheñ mire siine ke daaġh

kis qadar kamzor hai mera wajud

kis qadar be-mehr hai duniya meri

kis qadar be-ant hai KHwabon ki dhund

jab nikalta hun sahar-dam shahr mein

koi shai deti nahin apna pata

bhulne lagta hun apna nam tak

dhup mein uDte hue phulon ke rang

shaKH par mahw-e-suKHan chiDiyon ke ghol

aaine zar se sitare waswase

sab ne pahna ajnabiyyat ka libas

miT gai pahchan KHun-o-zisht ki

uD gai miTTi se aab-o-tab-e-shab

ruk gai ek moD par fasl-e-nabaat

kho gae mujh se achanak mere lafz

lafz han kuchh lafz the jin ke liye

muztarib rahte the mere jism-o-jaan

sarsaraate the lahu mein shesh-nag

jama hoti thi mere sine mein aag

jis ke pahlu mein kabhi KHwabida the

KHwab-o-KHushbu se mahakte KHana-e-bagh

jin mein lau dete the us ke surKH honT

aur meri aankhen mere sine ke dagh