kuchh log

duniyā kī lambī rāhoñ par ham yuuñ to chalte jaate haiñ

kuchh aise log bhī milte haiñ jo yaad hamesha aate haiñ

vo raah badalte haiñ apnī aur muḌ kar haath hilāte haiñ

lekin vo diloñ ko yādoñ kī ḳhushbū ban kar mahkāte haiñ

aise hī safar karte-karte ik shaḳhs milā ham ko bhī kahīñ

duniyā meñ achchhe log bahut lekin us kī sī baat nahīñ

vo dhīme lahje vaalā thā aur dhīre se hañstā thā

jitne bhī log mile ham ko sach jaano sab se achchhā thā

thī laag na us ke boloñ meñ kī baat na koī lagāvaT kī

us ke fiqre TūTe-TūTe us kī āñkheñ khoī-khoī

kah kar hī na de jo ham chāheñ sochā hī kare baiThā-baiThā

par dekhe aisī narmī se ik baar to ho jaa.e dhokā

go saath hamārā ḳhuub rahā us ko na huī pahchān bahut

gar buujh le dil kī baat kabhī ho jaatā thā hairān bahut

aur ham us kī hairānī par sharminda ho kar rah jaate

kuchh aur hamārā matlab thā phir der talak ye samjhāte

ab chehra us kā ujlā ho yā āñkheñ us kī hoñ gahrī

yā us ke pyāre hoñToñ kī har baat lage Thahrī-Thahrī

kuchh achchhe log jo achchhe hote haiñ aur rāhoñ meñ mil jaate haiñ

haiñ un ko apne kaam bahut kab apnā vaqt gañvāte haiñ

kab pyāse-pyāse rahte haiñ kab jī ko rog lagāte haiñ

duniya ki lambi rahon par hum yun to chalte jate hain

kuchh aise log bhi milte hain jo yaad hamesha aate hain

wo rah badalte hain apni aur muD kar hath hilate hain

lekin wo dilon ko yaadon ki KHushbu ban kar mahkate hain

aise hi safar karte-karte ek shaKHs mila hum ko bhi kahin

duniya mein achchhe log bahut lekin us ki si baat nahin

wo dhime lahje wala tha aur dhire se hansta tha

jitne bhi log mile hum ko sach jaano sab se achchha tha

thi lag na us ke bolon mein ki baat na koi lagawaT ki

us ke fiqre TuTe-TuTe us ki aankhen khoi-khoi

kah kar hi na de jo hum chahen socha hi kare baiTha-baiTha

par dekhe aisi narmi se ek bar to ho jae dhoka

go sath hamara KHub raha us ko na hui pahchan bahut

gar bujh le dil ki baat kabhi ho jata tha hairan bahut

aur hum us ki hairani par sharminda ho kar rah jate

kuchh aur hamara matlab tha phir der talak ye samjhate

ab chehra us ka ujla ho ya aankhen us ki hon gahri

ya us ke pyare honTon ki har baat lage Thahri-Thahri

kuchh achchhe log jo achchhe hote hain aur rahon mein mil jate hain

hain un ko apne kaam bahut kab apna waqt ganwate hain

kab pyase-pyase rahte hain kab ji ko rog lagate hain