kuchh nahin ke do pahlu

jinheñ ishq se vāsta kuchh nahīñ

unheñ husn se kyā milā kuchh nahīñ

jahāñ zohd-e-ḳhushk aa gayā us jagah

mohabbat muravvat vafā kuchh nahīñ

ḳhudā jaane kis dil se kahte haiñ log

hasīñ aur un kī adā kuchh nahīñ

nahīñ haiñ jo tanvīr-e-dil māh-vash

shab-e-māh meñ bhī maza kuchh nahīñ

sharar haiñ ye hañsmukh sitāre agar

to har ḳhanda-e-ḳhush-numā kuchh nahīñ

nazar ke haiñ dhoke manāzir agar

to phir ye chaman ye fazā kuchh nahīñ

hakīmoñ pe hairat na ho kyoñ mujhe

baḌhā ilm to kah diyā kuchh nahīñ

na saaqī na sāġhar na shāhid na baaġh

ma.aal in kī tahqīq kā kuchh nahīñ

vajūd un kā merī nazar meñ bhī kyā

adam hai adam ke sivā kuchh nahīñ

kahūñ kaise hastī ke gulzār meñ

fanā hī fanā hai baqā kuchh nahīñ

maiñ ḳhush husn se huuñ sivā husn ke

mirī ziist kā mudda.ā kuchh nahīñ

agar merī nazroñ se dekhe koī

baqā hī baqā hai fanā kuchh nahīñ

ye māmūra-e-husn hai to yahāñ

ḳhushī hai ḳhushī ke sivā kuchh nahīñ

nigāh-e-haqīqat ras-e-husn se

ta.alluq ġham-o-rañj kā kuchh nahīñ

maze ahl-e-dil ke liye haiñ bahut

kahā maiñ ne kab yaañ maza kuchh nahīñ

ye saaqī ye sāġhar ye shāhid ye baaġh

halāvat hai dil meñ to kyā kuchh nahīñ

jinhen ishq se wasta kuchh nahin

unhen husn se kya mila kuchh nahin

jahan zohd-e-KHushk aa gaya us jagah

mohabbat murawwat wafa kuchh nahin

KHuda jaane kis dil se kahte hain log

hasin aur un ki ada kuchh nahin

nahin hain jo tanwir-e-dil mah-wash

shab-e-mah mein bhi maza kuchh nahin

sharar hain ye hansmukh sitare agar

to har KHanda-e-KHush-numa kuchh nahin

nazar ke hain dhoke manazir agar

to phir ye chaman ye faza kuchh nahin

hakimon pe hairat na ho kyon mujhe

baDha ilm to kah diya kuchh nahin

na saqi na saghar na shahid na bagh

maal in ki tahqiq ka kuchh nahin

wajud un ka meri nazar mein bhi kya

adam hai adam ke siwa kuchh nahin

kahun kaise hasti ke gulzar mein

fana hi fana hai baqa kuchh nahin

main KHush husn se hun siwa husn ke

meri zist ka muddaa kuchh nahin

agar meri nazron se dekhe koi

baqa hi baqa hai fana kuchh nahin

ye mamura-e-husn hai to yahan

KHushi hai KHushi ke siwa kuchh nahin

nigah-e-haqiqat ras-e-husn se

talluq gham-o-ranj ka kuchh nahin

maze ahl-e-dil ke liye hain bahut

kaha main ne kab yan maza kuchh nahin

ye saqi ye saghar ye shahid ye bagh

halawat hai dil mein to kya kuchh nahin