kulliyat-e-gham-e-jahan

ham samajhte the shā'irī karnā

koī āsān sā 'amal hogā

raat din husn chāñd sūraj tum

har koī shāmil-e-ġhazal hogā

zindagī maut 'ishq dil duniyā

aur bhī hoñge nazm ke 'unvāñ

lafz jazbe ḳhayāl ke paikar

kuchh ġham-e-yār kuchh ġham-e-daurāñ

aur phir ek roz yuuñ hogā

ham bhī do chaar jaam gaTkeñge

be-sabab be-ḳhudī kī hālat meñ

raat bhar shahr bhar meñ bhaTkeñge

phir to har roz sāġhar-o-mīnā

ham nazar ā.eñge sharābī se

shā'iroñ ko sharāb jurm nahīñ

kyoñ ki ġhālib sharāb piite the

lekin ik roz kyā sunā maiñ ne

shahr bhopal zor se chīḳhā

chāroñ jānib galī saḌī lāsheñ

har taraf raqs thā tabāhī kā

zahr sā ghul gayā havāoñ meñ

saañs aatī thī maut kī sūrat

log rote the aur bhāgte the

maut ke ḳhauf se kisī sūrat

log nāloñ meñ kuud jaate the

jism jā-e-panāh DhūñDte the

ek dariyā-e-ḳhūn jaarī thā

jism ke zaḳhm raah DhūñDte the

sochtā huuñ yatīm bachchoñ ko

kis ne shafqat kī chhāoñ dī hogī

dard-o-ġham se bilaktī maaoñ ko

kis ne talqīn-e-sabr kī hogī

yuuñ nahīñ hai kalām-e-ġhālib meñ

kuchh nahīñ thā shu’ūr-e-fan ke liye

yuuñ nahīñ hai ki 'mīr' kī ġhazleñ

vāhima thiiñ mire suḳhan ke liye

'momin'-o-'dāġh' 'ātish'-o-'nāsiḳh'

yā 'anīs'-o-'dabīr' 'zauq'-o-'nasīm'

sab davāvīn haiñ mutāle meñ

saare shā'ir ki sab jadīd-o-qadīm

jab talak kuchh mushāhidāt na hoñ

shā'irī meñ maza nahīñ aatā

dard kī raah se chale aao

to ḳhayāloñ meñ kyā nahīñ aatā

ye mirā daur ye mirī duniyā

har koī apne aap meñ gum hai

'ishq rangīniyoñ meñ Duubā hai

aur lab-e-husn par tabassum hai

ab ḳhulāsa tamām chīzoñ kā

aḳhz kiije kitāb-e-jāñ paḌh kar

kuchh hameñ bhī shu'ūr aayā hai

kulliyāt-e-ġham-e-jahāñ paḌh kar

hum samajhte the sha'iri karna

koi aasan sa 'amal hoga

raat din husn chand suraj tum

har koi shamil-e-ghazal hoga

zindagi maut 'ishq dil duniya

aur bhi honge nazm ke 'unwan

lafz jazbe KHayal ke paikar

kuchh gham-e-yar kuchh gham-e-dauran

aur phir ek roz yun hoga

hum bhi do chaar jam gaTkenge

be-sabab be-KHudi ki haalat mein

raat bhar shahr bhar mein bhaTkenge

phir to har roz saghar-o-mina

hum nazar aaenge sharabi se

sha'iron ko sharab jurm nahin

kyon ki ghaalib sharab pite the

lekin ek roz kya suna main ne

shahr bhopal zor se chiKHa

chaaron jaanib gali saDi lashen

har taraf raqs tha tabahi ka

zahr sa ghul gaya hawaon mein

sans aati thi maut ki surat

log rote the aur bhagte the

maut ke KHauf se kisi surat

log nalon mein kud jate the

jism ja-e-panah DhunDte the

ek dariya-e-KHun jari tha

jism ke zaKHm rah DhunDte the

sochta hun yatim bachchon ko

kis ne shafqat ki chhaon di hogi

dard-o-gham se bilakti maon ko

kis ne talqin-e-sabr ki hogi

yun nahin hai kalam-e-ghaalib mein

kuchh nahin tha shu’ur-e-fan ke liye

yun nahin hai ki 'mir' ki ghazlen

wahima thin mere suKHan ke liye

'momin'-o-'dagh' 'atish'-o-'nasiKH'

ya 'anis'-o-'dabir' 'zauq'-o-'nasim'

sab dawawin hain mutale mein

sare sha'ir ki sab jadid-o-qadim

jab talak kuchh mushahidat na hon

sha'iri mein maza nahin aata

dard ki rah se chale aao

to KHayalon mein kya nahin aata

ye mera daur ye meri duniya

har koi apne aap mein gum hai

'ishq ranginiyon mein Duba hai

aur lab-e-husn par tabassum hai

ab KHulasa tamam chizon ka

aKHz kije kitab-e-jaan paDh kar

kuchh hamein bhi shu'ur aaya hai

kulliyat-e-gham-e-jahan paDh kar