kullu man alaiha fan

zamāna az-sar-e-nau ye gavāhī de rahā hai

azal se tā-abad sab kuchh fanā hai

magar ik ḳhvāhish-e-be-sūd har insān ke andar panaptī hai

ye har insān kī fitrat meñ shāmil hai

jo har pal ye samajhtā hai

ki miTTī kūza-gar ke nuur meñ gūñdhī ga.ī hai

ye fitrat be-mahābā hai

jo kūza-gar ke hāthoñ se

har ik insān meñ shāmil huī hai

har ik insān bas ik vāhime meñ hai

ki vo bhī lā-fanā hai

zamīñ par phūlte insān ko apnī paḌī hai

yahāñ har ik nafas shorīda-ḳhātir phir rahā hai

yahāñ har ek apnī ḳhvāhishoñ kī qaid meñ uljhā huā

bas ye samajhtā hai

ki har tār-e-nafas par āyat-e-ramz-e-baqā hai

zamīñ kī kokh meñ so.e huoñ se pūchhtā koī nahīñ

ki us taraf duniyā meñ kyā mahshar bapā hai

darīda-pairahan phirtā huā insān

apnī āḳhirī ḳhvāhish pe chaukīdār nāfiz kar rahā hai

ab is ko kaun samjhā.e

ḳhalā ke us taraf kuchh bhī nahīñ pinhāñ

ye duniyā ḳhvāhishoñ kī qaid meñ

uljhe hue insāñ kā piñjra hai

jo apnī ḳhvāhishoñ kī taal par

kuchh yuuñ thiraktā hai samajhtā hai ki

sab kuchh mil gayā shāyad

magar ye sab ḳhalal hai vāhima hai

ye dimāġhī atomoñ kī kokh meñ pinhāñ ḳhalā hai

jo kabhī bhartā nahīñ hai

zamana az-sar-e-nau ye gawahi de raha hai

azal se ta-abad sab kuchh fana hai

magar ek KHwahish-e-be-sud har insan ke andar panapti hai

ye har insan ki fitrat mein shamil hai

jo har pal ye samajhta hai

ki miTTi kuza-gar ke nur mein gundhi gai hai

ye fitrat be-mahaba hai

jo kuza-gar ke hathon se

har ek insan mein shamil hui hai

har ek insan bas ek wahime mein hai

ki wo bhi la-fana hai

zamin par phulte insan ko apni paDi hai

yahan har ek nafas shorida-KHatir phir raha hai

yahan har ek apni KHwahishon ki qaid mein uljha hua

bas ye samajhta hai

ki har tar-e-nafas par aayat-e-ramz-e-baqa hai

zamin ki kokh mein soe huon se puchhta koi nahin

ki us taraf duniya mein kya mahshar bapa hai

darida-pairahan phirta hua insan

apni aaKHiri KHwahish pe chaukidar nafiz kar raha hai

ab is ko kaun samjhae

KHala ke us taraf kuchh bhi nahin pinhan

ye duniya KHwahishon ki qaid mein

uljhe hue insan ka pinjra hai

jo apni KHwahishon ki tal par

kuchh yun thirakta hai samajhta hai ki

sab kuchh mil gaya shayad

magar ye sab KHalal hai wahima hai

ye dimaghi atomon ki kokh mein pinhan KHala hai

jo kabhi bharta nahin hai