kundan

kundan saaTh baras kā būḌhā chhoTe qadam uThātā hai

sub.h savere dhīre dhīre pul par baiThne aatā hai

daa.eñ baa.eñ us kī nigāheñ dauḌtī haiñ kuchh DhūñDhtī haiñ

tiis baras pahle kā zamāna āñkhoñ meñ phir jaatā hai

biite dinoñ kā tasavvur dil ke dukh ko aur baḌhātā hai

duniyā ik din us kī thī ye duniyā āḳhir kis kī huī

kundan chalte chalte baiThe baiThe bhī thak jaatā hai

jaise use qurb-e-manzil se Dar lagtā ho ḳhauf aatā hai

kundan dhīre chaltā hai aur tezī se ghabrātā hai

bachchoñ kī chustī chālākī par aksar jhuñjhlātā hai

''ek musībat ek qayāmat na.e zamāne kī aulād

agle vaqt kī azmat aur sharāfat kar Daalī barbād''

aksar agle vaqt kī bāteñ hañs hañs ke dohrātā hai

us kī kamar kā ḳham aksar is mauqe par tan jaatā hai

jab koī schōl ko jaatī phuul sī sho.ala-gūñ laḌkī

dekhtā hai bol uThtā hai ye kaisā zamāna aayā hai

rañg-rūp ke bechne vaalī kā sā svāñg rachāyā hai

achchhā ishvar terī marzī!! ye bhī musībat sahnā thī

shukr hai agle vaqtoñ kī beTī ke aise Dhañg na the

laaj hī us kā jauban thī aur laaj hī us kā gahnā thī

lekin doshīza ke sarāpā meñ kundan kho jaatā hai

kundan sub.h-savere nahr ke pul par baiThne aatā hai

aksar agle vaqt kī bāteñ hañs hañs ke dohrātā hai

us kī kamar kā ḳham aksar is mauqe par tan jaatā hai

kitnī ḳhush-uslūbī se apnī ḳhiffat ko chhupātā hai

kundan saTh baras ka buDha chhoTe qadam uThata hai

subh sawere dhire dhire pul par baiThne aata hai

daen baen us ki nigahen dauDti hain kuchh DhunDhti hain

tis baras pahle ka zamana aankhon mein phir jata hai

bite dinon ka tasawwur dil ke dukh ko aur baDhata hai

duniya ek din us ki thi ye duniya aaKHir kis ki hui

kundan chalte chalte baiThe baiThe bhi thak jata hai

jaise use qurb-e-manzil se Dar lagta ho KHauf aata hai

kundan dhire chalta hai aur tezi se ghabraata hai

bachchon ki chusti chaalaki par aksar jhunjhlata hai

ek musibat ek qayamat nae zamane ki aulad

agle waqt ki azmat aur sharafat kar Dali barbaad

aksar agle waqt ki baaten hans hans ke dohraata hai

us ki kamar ka KHam aksar is mauqe par tan jata hai

jab koi school ko jati phul si shoala-gun laDki

dekhta hai bol uThta hai ye kaisa zamana aaya hai

rang-rup ke bechne wali ka sa swang rachaya hai

achchha ishwar teri marzi!! ye bhi musibat sahna thi

shukr hai agle waqton ki beTi ke aise Dhang na the

laj hi us ka jauban thi aur laj hi us ka gahna thi

lekin doshiza ke sarapa mein kundan kho jata hai

kundan subh-sawere nahr ke pul par baiThne aata hai

aksar agle waqt ki baaten hans hans ke dohraata hai

us ki kamar ka KHam aksar is mauqe par tan jata hai

kitni KHush-uslubi se apni KHiffat ko chhupata hai