kutta bhaunkta hai

purāne shahar kī vīrāñ galī meñ

jab bhī aadhī raat hotī hai

to kuttā bhauñktā hai

kuttā bhauñktā hai

ek saayā sā ubhartā hai

mire kamre ke vīrāñ taaq par rakkhe

diye kī lau laraztī hai

saḌak ke ik sire se ajnabī sī chaap ubhartī hai

udāsī ghar ke darvāze par aa kar

bain kartī hai

aur kuttā bhauñktā hai

kuttā bhauñktā hai

nīm-shab ko dushmanoñ kī fauj kī yalġhār se

shahzādiyāñ sab

sar barahna bhāgtī haiñ

aur raaja qatl hotā hai

fasīl-e-shahr pe sar kaaT kar laTkā.e jaate haiñ

nayā farmān jaarī hotā hai

aur itā.at ke liye sab log jhukte haiñ

zamīñ par

āsmāñ se ik sitāra TuuT girtā hai

havā fariyād kartī hai

daraḳhtoñ meñ ajab sargoshiyāñ sī hone lagtī haiñ

mire kamre ke vīrāñ taaq par rakkhe

diye kī lau laraztī hai

aur azhdahā nikal kar fāḳhta kī narm gardan se

lipaTtā hai

rivāyat hai hamāre shahr kī

jab bhī musībat aatī hai

to nīm-shab ko azāneñ gūñjtī haiñ

log jāneñ shahr pe koī qayāmat aa.ī hai

is shab

ġhanīm-e-shahar ke aage

itā.at ke liye sab log jhukte haiñ

azaañ koī nahīñ detā

purāne shahr kī vīrāñ galī meñ

ek kuttā bhauñktā hai

purane shahar ki viran gali mein

jab bhi aadhi raat hoti hai

to kutta bhaunkta hai

kutta bhaunkta hai

ek saya sa ubharta hai

mere kamre ke viran taq par rakkhe

diye ki lau larazti hai

saDak ke ek sire se ajnabi si chap ubharti hai

udasi ghar ke darwaze par aa kar

bain karti hai

aur kutta bhaunkta hai

kutta bhaunkta hai

nim-shab ko dushmanon ki fauj ki yalghaar se

shahzadiyan sab

sar barahna bhagti hain

aur raja qatl hota hai

fasil-e-shahr pe sar kaT kar laTkae jate hain

naya farman jari hota hai

aur itaat ke liye sab log jhukte hain

zamin par

aasman se ek sitara TuT girta hai

hawa fariyaad karti hai

daraKHton mein ajab sargoshiyan si hone lagti hain

mere kamre ke viran taq par rakkhe

diye ki lau larazti hai

aur azhdaha nikal kar faKHta ki narm gardan se

lipaTta hai

riwayat hai hamare shahr ki

jab bhi musibat aati hai

to nim-shab ko azanen gunjti hain

log jaanen shahr pe koi qayamat aai hai

is shab

ghanim-e-shahar ke aage

itaat ke liye sab log jhukte hain

azan koi nahin deta

purane shahr ki viran gali mein

ek kutta bhaunkta hai