کوفہ مزاج

رکو محبت کے خانوادے کے شاہزادے

رکو کہاں عجلتوں میں جانیں لٹا رہے ہو

کہاں لہو سے چراغ روشن کیے کھڑے ہو

یہ کیسے لوگوں سے عہد الفت نبھا رہے ہو

یہ لوگ وہ ہیں جو تیرے زخموں کو گھاؤ کر کے

ہوائیں دیں گے شرر کو خود ہی الاؤ کر کے

تری وفا کا جنوں سلامت ہو تا قیامت

یہ لوگ لیکن وفائیں بیچیں گے بھاؤ کر کے

سنو محبت کے خانوادے کے شاہزادے

یہ دھیان رکھنا کہ تم سے پہلے ہمیں جنوں تھا

ہمیں جنوں تھا کہ اس قبیلے میں جاں لٹائیں

ہمیں جنوں تھا کہ وحشتوں سے سکوں بنائیں

وہ ہم تھے صحرا کو جو سمندر بنا رہے تھے

وہ ہم تھے جو پتھروں کو دھڑکن سکھا رہے تھے

مگر یہ کوفہ مزاج لوگوں کی عادتیں ہیں

امام ان کی وفا کی خاطر علم اٹھائے

امام اپنے لہو سے صحرا میں رنگ لائے

تو یہ قبیلہ یزید کی صف میں جا رکے گا

تمہی غلط تھے تمہی غلط ہو تمہیں کہے گا

سنو محبت کے خانوادے کے شاہزادے

یہ بے وفائی کا سلسلہ ہے نہیں رکے گا