kya aur kaun

purāne daur meñ rahtā thā ik kisān aisā

jo baat baat pe sab se savāl kartā thā

hasīn aur zahīn apne donoñ beToñ ke

ḳhud us ne naam bhī kyā aur kaun rakkhe the

baḌā thā umr meñ kyā us se kaun thā chhoTā

sharīr donoñ the aur qad thā donoñ kā ūñchā

ye vāqi.a hai ki ik roz apnī hājat se

za.iif aayā koī un ke baap se milne

kahā ye donoñ ne is se abhī ga.e haiñ kahīñ

vo lauT ā.eñge jaldī hameñ hai is kā yaqīñ

agar ho kaam zarūrī to baiThiye baabā

za.iif soch ke kuchh un ke ghar meñ baiTh gayā

savāl us ne kiyā kyā se kyā hai naam tirā

javāb hañs ke diyā kyā ne kyā hai naam mirā

kahā za.iif ne maiñ sun sakā na naam tirā

ḳhudā-rā phir se batā mujh ko terā naam hai kyā

to kyā ne zor se fauran kahā ki maiñ kyā huuñ

tumhārā beTā huuñ baabā tumhārā beTā huuñ

za.iif sun ke huā mushta.il javāb us kā

ruḳh apnā kaun kī jānib phir us ne moḌ liyā

kiyā savāl ye us se hai bhaa.ī kaun tirā

kahā ye kaun ne kyā merā bhaa.ī hai baabā

za.iif zor se bolā ki kyā hai naam tirā

kahā ye kaun ne maiñ kaun huuñ mire baabā

kiyā savāl ye phir us se terā naam hai kyā

mire savāl ko kyā ab bhī tū nahīñ samjhā

batā tū kaun hai ye sun ke kaun phir bolā

maiñ kaun huuñ ye haqīqat hai ai mire baabā

kahā ye kyā ne mirā naam kyā hai ai baabā

nahīñ hai shak koī is meñ hai bhaa.ī kaun mirā

za.iif sun ke ye aape se ho gayā bāhar

kahā ki sharm ho tum par sharīr-o-bad aḳhtar

ye kah ke tezī se bāhar nikal gayā ghar se

sharīr laḌke magar khilkhilā ke hañste rahe

purane daur mein rahta tha ek kisan aisa

jo baat baat pe sab se sawal karta tha

hasin aur zahin apne donon beTon ke

KHud us ne nam bhi kya aur kaun rakkhe the

baDa tha umr mein kya us se kaun tha chhoTa

sharir donon the aur qad tha donon ka uncha

ye waqia hai ki ek roz apni hajat se

zaif aaya koi un ke bap se milne

kaha ye donon ne is se abhi gae hain kahin

wo lauT aaenge jaldi hamein hai is ka yaqin

agar ho kaam zaruri to baiThiye baba

zaif soch ke kuchh un ke ghar mein baiTh gaya

sawal us ne kiya kya se kya hai nam tera

jawab hans ke diya kya ne kya hai nam mera

kaha zaif ne main sun saka na nam tera

KHuda-ra phir se bata mujh ko tera nam hai kya

to kya ne zor se fauran kaha ki main kya hun

tumhaara beTa hun baba tumhaara beTa hun

zaif sun ke hua mushtail jawab us ka

ruKH apna kaun ki jaanib phir us ne moD liya

kiya sawal ye us se hai bhai kaun tera

kaha ye kaun ne kya mera bhai hai baba

zaif zor se bola ki kya hai nam tera

kaha ye kaun ne main kaun hun mere baba

kiya sawal ye phir us se tera nam hai kya

mere sawal ko kya ab bhi tu nahin samjha

bata tu kaun hai ye sun ke kaun phir bola

main kaun hun ye haqiqat hai ai mere baba

kaha ye kya ne mera nam kya hai ai baba

nahin hai shak koi is mein hai bhai kaun mera

zaif sun ke ye aape se ho gaya bahar

kaha ki sharm ho tum par sharir-o-bad aKHtar

ye kah ke tezi se bahar nikal gaya ghar se

sharir laDke magar khilkhila ke hanste rahe