kya hogi peDon ki zat

kyā hogī peḌoñ kī zaat

kabhī sochā hai aap ne

savāl aTpaTā hai

lekin kyuuñ nahīñ bāñTā

use ham ne zāt-pāt meñ

chalo ek ek kar ke bāñTte haiñ peḌoñ ko

phal vaale peḌ aur phuul vaale peḌ

baḌī baḌī bhujāoñ vaale

chhoTī chhoTī Tahniyoñ vaale peḌ

vo aam kā peḌ

jo havan meñ jaltā haiñ

bābhan hogā

kyūñki us ke pattoñ kī puujā bhī hotī haiñ

phal bhī khub rasīlā mantroñ kī tarah

babūl kā peḌ chhāyā nahīñ detā

us ke kāñTe chubh jaa.e to dard hotā hai

aur ḳhuun nikaltā hai

lekin baḌā mazbūt hotā hai

babūl shāyad Thākur hogā

baniyā to mahuvā hogā

us ke pattoñ se pattal bantī haiñ

rasīle phal aañTe meñ

miij kar gujiyā banāte haiñ

sukhā kar us ke phal dukān par bech dete haiñ

tel bhī miltā hai mahuve kī koiyyā se

lakḌī to us kī baḌe kaam aatī haiñ

kuchh peḌ hai

jo jaldī jaldī baḌhte hai

un kī lakḌī jlāvan bantī haiñ

amaltās merā harījan hogā

bas baḌhtā hai aur kaTtā hai

us ke kaTne par kisī ko dukh nahīñ hotā

savāl merā paḌh kar

sochoge tum

pāgal ho gayā bastī

bahkī bahkī sī bāteñ kartā hai

to kyuuñ nahīñ sochte

insāno ko zāt-pāt meñ bāñTne par

chalo ek ek kar ke

bāñTte haiñ peḌoñ ko

kya hogi peDon ki zat

kabhi socha hai aap ne

sawal aTpaTa hai

lekin kyun nahin banTa

use hum ne zat-pat mein

chalo ek ek kar ke banTte hain peDon ko

phal wale peD aur phul wale peD

baDi baDi bhujaon wale

chhoTi chhoTi Tahniyon wale peD

wo aam ka peD

jo hawan mein jalta hain

babhan hoga

kyunki us ke patton ki puja bhi hoti hain

phal bhi khub rasila mantron ki tarah

babul ka peD chhaya nahin deta

us ke kanTe chubh jae to dard hota hai

aur KHun nikalta hai

lekin baDa mazbut hota hai

babul shayad Thakur hoga

baniya to mahuwa hoga

us ke patton se pattal banti hain

rasile phal aanTe mein

mij kar gujiya banate hain

sukha kar us ke phal dukan par bech dete hain

tel bhi milta hai mahuwe ki koiyya se

lakDi to us ki baDe kaam aati hain

kuchh peD hai

jo jaldi jaldi baDhte hai

un ki lakDi jlawan banti hain

amaltas mera harijan hoga

bas baDhta hai aur kaTta hai

us ke kaTne par kisi ko dukh nahin hota

sawal mera paDh kar

sochoge tum

pagal ho gaya basti

bahki bahki si baaten karta hai

to kyun nahin sochte

insano ko zat-pat mein banTne par

chalo ek ek kar ke

banTte hain peDon ko