کیا کہہ گئی ہے باغ سے باد خزاں نہ پوچھ

ہنگامۂ کشاکش سود و زیاں نہ پوچھ

شاید کہ ہو رہا ہے پھر اک امتحاں نہ پوچھ

کیوں کر لٹی ہے جنس گراں مایۂ نشاط

ویراں ہوا ہے کیسے بھرا آشیاں نہ پوچھ

شاید سجھا گئی ہے مآل چمن کا راز

کیا کہہ گئی ہے باغ سے باد خزاں نہ پوچھ

اے ناشناس قیمت آزادیٔ حیات

حاصل ہوئی ہے چیز یہ کتنی گراں نہ پوچھ

تفریق باہمی یہ تشتت یہ افتراق

خرمن جلا نہ دیں کہیں یہ بجلیاں نہ پوچھ

اپنی جگہ بھی کیوں کوئی اب مطمئن نہیں

نکتہ نہیں یہ قابل شرح و بیاں نہ پوچھ

الجھا ہوا ہے باہمی جنگ و جدل میں کیوں

دنیا پہنچ گئی ہے کہاں سے کہاں نہ پوچھ

عبرت نظر سے دیکھ مآل گل و چمن

دستور انقلاب بہار و خزاں نہ پوچھ

جن سے ہے اب بھی دامن انسان لالہ زار

افسانۂ حیات کی وہ سرخیاں نہ پوچھ

فتنہ کوئی جہاں میں نیا جاگتا نہ ہو

اٹھا ہے کیوں یہ شور غم نا گہاں نہ پوچھ

انعامؔ زندگی کے حقائق کے واسطے

لازم ہے کس قدر نظر نکتہ داں نہ پوچھ