kya kahiye

chaa.e kī mez se lag kar maiñ khaḌā thā ḳhāmosh

vo samosoñ se bharī plate liye paas aa.ī

aur pūchā bahut āhista se

''nāk kī kiil ko añgrezī meñ kyā kahte haiñ''

umr hogī koī chaubīs baras

DheḌh do saal kā beTā thā bahut pyārā sā

jo kabhī god meñ hotā to kabhī bhaag ke

āñgan meñ chalā jāatā thā

naak meñ baa.eñ taraf kiil thī ā.ankhoñ meñ chamak

aur chamak vo jo gunāhoñ ko chhupā letī hai

kaale bāloñ meñ guñdhī shaam kī ra.anā.ī thī

aisī ra.anā.ī jo ādāb bhulā detī hai

zabt aur fahm ko nā-vaqt sulā detī hai

ḳhuun meñ soī huī aag jagā detī hai

daad denā to bahut daur kī baat

ek bhī nazm tavajjoh se nahī us ne sunī

ham kahīñ aur rahe aur vo kahīñ aur rahī

''nāk kī kiil ko añgrezī meñ kyā kahte haiñ''

chae ki mez se lag kar main khaDa tha KHamosh

wo samoson se bhari plate liye pas aai

aur pucha bahut aahista se

nak ki kil ko angrezi mein kya kahte hain

umr hogi koi chaubis baras

DheDh do sal ka beTa tha bahut pyara sa

jo kabhi god mein hota to kabhi bhag ke

aangan mein chala jaata tha

nak mein baen taraf kil thi aaankhon mein chamak

aur chamak wo jo gunahon ko chhupa leti hai

kale baalon mein gundhi sham ki ranai thi

aisi ranai jo aadab bhula deti hai

zabt aur fahm ko na-waqt sula deti hai

KHun mein soi hui aag jaga deti hai

dad dena to bahut daur ki baat

ek bhi nazm tawajjoh se nahi us ne suni

hum kahin aur rahe aur wo kahin aur rahi

nak ki kil ko angrezi mein kya kahte hain