kya KHabar thi

kyā ḳhabar thī riyāsat-e-islām

mujrmoñ kī panāh bhī hogī

kyā ḳhabar thī ye adl kī jāgīr

rahm kī qatl-gāh bhī hogī

pā.eñge dushmanān-e-dīñ e.azāz

qātiloñ kī rifāh bhī hogī

zulm ke haath meñ asā hogā

aur sar par kulāh bhī hogī

jahl pā.egā ilm par sabqat

aur ḳhirad gard-e-rāh bhī hogī

a.alā ohdoñ pe hoñge sab nā-ahl

tang-nazarī athāh bhī hogī

ghaat meñ hogī fauj apnī bhī

dushmanoñ kī sipāh bhī hogī

bādshah ke jo giit gā.eñge

un kī jānib nigāh bhī hogī

jo likhegā qasīda-e-shāhī

us ko tā.īd-e-shāh bhī hogī

jurm ho jā.egā bahut arzāñ

ishtihā-e-gunāh bhī hogī

sirf ġhaddār pā.eñge tamġhe

un kī hī izz-o-jāh bhī hogī

log har zulm par raheñge chup

is tarah se nibāh bhī hogī

qaum taḌpegī daad leñge vazīr

aah bhī hogī vaah bhī hogī

phir girānī kā aa.egā tūfān

muflisī be-panāh bhī hogī

khul ke hogī zaḳhīra-andozī

aur safed-o-siyāh bhī hogī

toḌeñge kamar avaam kī tex

aur ma.īshat tabāh bhī hogī

ġham kī parchhā.iyoñ se arz-e-vatan

kyā ḳhabar thī siyāh bhī hogī

aur vo vaqt phir se aa.egā

jab taraqqī kī chaah bhī hogī

log māñgeñge ik na.ī hijrat

chal paḌeñge to raah bhī hogī

kya KHabar thi riyasat-e-islam

mujrmon ki panah bhi hogi

kya KHabar thi ye adl ki jagir

rahm ki qatl-gah bhi hogi

paenge dushmanan-e-din eazaz

qatilon ki rifah bhi hogi

zulm ke hath mein asa hoga

aur sar par kulah bhi hogi

jahl paega ilm par sabqat

aur KHirad gard-e-rah bhi hogi

aala ohdon pe honge sab na-ahl

tang-nazari athah bhi hogi

ghat mein hogi fauj apni bhi

dushmanon ki sipah bhi hogi

baadshah ke jo git gaenge

un ki jaanib nigah bhi hogi

jo likhega qasida-e-shahi

us ko taid-e-shah bhi hogi

jurm ho jaega bahut arzan

ishtiha-e-gunah bhi hogi

sirf ghaddar paenge tamghe

un ki hi izz-o-jah bhi hogi

log har zulm par rahenge chup

is tarah se nibah bhi hogi

qaum taDpegi dad lenge wazir

aah bhi hogi wah bhi hogi

phir girani ka aaega tufan

muflisi be-panah bhi hogi

khul ke hogi zaKHira-andozi

aur safed-o-siyah bhi hogi

toDenge kamar awam ki tex

aur maishat tabah bhi hogi

gham ki parchhaiyon se arz-e-watan

kya KHabar thi siyah bhi hogi

aur wo waqt phir se aaega

jab taraqqi ki chah bhi hogi

log mangenge ek nai hijrat

chal paDenge to rah bhi hogi