kya rishta hai mera

aksar maiñ ne ye sochā hai

tujh se kyā rishta hai merā

is duniyā meñ kitne chehre

apne bhī begāne bhī haiñ

jaane bhī haiñ anjāne bhī haiñ

chehroñ kī isī jhurmuT meñ hai

terā chehra aisā chehra

zehn ke ā.īna-ḳhāne meñ roz-e-azal se jo rahtā hai

sapnoñ ke sāñchoñ meñ Dhal kar

rang badal kar ruup badal kar

aatā hai

ghere rahtā hai mujh ko halqe meñ yādoñ ke

yādoñ kī isī rāhguzar meñ

lākhoñ mahfil lākhoñ chehre

phir bhī mere dil darpan meñ

rahtā hai bas terā chehra

tere aage sajda karūñ

dil kahtā hai

terā vajūd mirī nazroñ meñ

hai na haqīqī hai na majāzī

tujh se kyā rishta hai merā

naam nahīñ hai is rishte kā

bas be-nām sā ik rishta hai

rishtoñ aur sapnoñ kī saarī bahs purānī

phir bhī tere

naam ke aate hī ye rishte

aur ye sapne

ruup haqīqat kā lete haiñ

tāzgī in meñ aa jaatī hai

josh nayā jazba an-jānā aa jaatā hai

jaise jaise vaqt guzar jaatā hai yādoñ ke nuqūsh

gahre hote jaate haiñ

ehsās kī shiddat

baḌhtī jaatī hai

vaqt guzar jā.egā ik din

shahr ujaḌ jā.eñge ik din

lekin

terī yaad kī ḳhushbū rah jā.egī

aur

āvāz kā paikar rangoñ meñ Dhal jā.egā

ḳhushbū ko rokā hai kis ne

āvāzeñ kab qaid huī haiñ

chāhat kab zanjīroñ ko detī hai dāvat

is liye lagtā hai shāyad

lamha-lamha pal-pal tere qurb kī ḳhushbū

baḌhtī jaatī hai

āvāz kā paikar

dā.era phailātā jaatā hai

chāhat kā ākāsh

ghanerā hotā jaatā hai

aksar main ne ye socha hai

tujh se kya rishta hai mera

is duniya mein kitne chehre

apne bhi begane bhi hain

jaane bhi hain anjaane bhi hain

chehron ki isi jhurmuT mein hai

tera chehra aisa chehra

zehn ke aaina-KHane mein roz-e-azal se jo rahta hai

sapnon ke sanchon mein Dhal kar

rang badal kar rup badal kar

aata hai

ghere rahta hai mujh ko halqe mein yaadon ke

yaadon ki isi rahguzar mein

lakhon mahfil lakhon chehre

phir bhi mere dil darpan mein

rahta hai bas tera chehra

tere aage sajda karun

dil kahta hai

tera wajud meri nazron mein

hai na haqiqi hai na majazi

tujh se kya rishta hai mera

nam nahin hai is rishte ka

bas be-nam sa ek rishta hai

rishton aur sapnon ki sari bahs purani

phir bhi tere

nam ke aate hi ye rishte

aur ye sapne

rup haqiqat ka lete hain

tazgi in mein aa jati hai

josh naya jazba an-jaana aa jata hai

jaise jaise waqt guzar jata hai yaadon ke nuqush

gahre hote jate hain

ehsas ki shiddat

baDhti jati hai

waqt guzar jaega ek din

shahr ujaD jaenge ek din

lekin

teri yaad ki KHushbu rah jaegi

aur

aawaz ka paikar rangon mein Dhal jaega

KHushbu ko roka hai kis ne

aawazen kab qaid hui hain

chahat kab zanjiron ko deti hai dawat

is liye lagta hai shayad

lamha-lamha pal-pal tere qurb ki KHushbu

baDhti jati hai

aawaz ka paikar

daera phailata jata hai

chahat ka aakash

ghanera hota jata hai