kyon na ho

aañkh vaalo husn-e-vahdat kā tamāshā kyoñ na ho

dil hai to rāz-e-haqīqat kī tamanna kyoñ na ho

apnī manzil kī taraf garm-e-safar hai kā.enāt

aadmī phir manzil-e-maqsad kā joyā kyoñ na ho

dil meñ har zarra ke pinhāñ hai tamanna kā sharār

qalb-e-insāñ hāmil-e-soz-e-tamanna kyoñ na ho

ik na ik ummīd kī mash.al jalānā hai to phir

sham.a-e-īmāñ hī kā dil-afroz ujālā kyoñ na ho

ik na ik dar kī jabīñ-sā.ī pe qismat ziist kī

kar de sab se be-niyāz ik aisā sajda kyoñ na ho

jab guzarnā hai sahāroñ hī par apnī zindagī

jo na de saktā ho dhokā vo sahārā kyoñ na ho

tishnagī meñ chand qatroñ par qanā.at kis liye

dāman-e-himmat harīf-e-josh-e-dariyā kyoñ na ho

aarzī partav hai jis kā ġhuncha-o-gul se ayaañ

us bahār-e-jāñ-fazā hī kī tamanna kyoñ na ho

muntazir jab ek fardā ke haiñ sab imroz-o-dosh

zindagī ko ehtimām-e-fikr-e-fardā kyoñ na ho

aañkh ke jalvoñ ko jab hāsil hai auj-e-e.atibār

hosh vaalo e.atibār-e-qalb-e-bīnā kyoñ na ho

nāḳhudā bhī jis pe rakhtā hai nazar tūfān meñ

naav vaalo ruḳh usī kī samt apnā kyoñ na ho

dil ke har zarra meñ hai ik ālam-e-nau jalva-gar

aañkh vaalo is jahāñ kā bhī tamāshā kyoñ na ho

jaan hī Thahrī bahā-e-nāz to ai dosto

chhoḌ kar zarroñ ko sūraj hī kā saudā kyoñ na ho

jab kisī an-dekhī tāqat par bharosa hai zarūr

dahr vaalo phir ḳhudā hī kā bharosa kyoñ na ho

aankh walo husn-e-wahdat ka tamasha kyon na ho

dil hai to raaz-e-haqiqat ki tamanna kyon na ho

apni manzil ki taraf garm-e-safar hai kaenat

aadmi phir manzil-e-maqsad ka joya kyon na ho

dil mein har zarra ke pinhan hai tamanna ka sharar

qalb-e-insan hamil-e-soz-e-tamanna kyon na ho

ek na ek ummid ki mashal jalana hai to phir

shama-e-iman hi ka dil-afroz ujala kyon na ho

ek na ek dar ki jabin-sai pe qismat zist ki

kar de sab se be-niyaz ek aisa sajda kyon na ho

jab guzarna hai sahaaron hi par apni zindagi

jo na de sakta ho dhoka wo sahaara kyon na ho

tishnagi mein chand qatron par qanaat kis liye

daman-e-himmat harif-e-josh-e-dariya kyon na ho

aarzi partaw hai jis ka ghuncha-o-gul se ayan

us bahaar-e-jaan-faza hi ki tamanna kyon na ho

muntazir jab ek farda ke hain sab imroz-o-dosh

zindagi ko ehtimam-e-fikr-e-farda kyon na ho

aankh ke jalwon ko jab hasil hai auj-e-eatibar

hosh walo eatibar-e-qalb-e-bina kyon na ho

naKHuda bhi jis pe rakhta hai nazar tufan mein

naw walo ruKH usi ki samt apna kyon na ho

dil ke har zarra mein hai ek aalam-e-nau jalwa-gar

aankh walo is jahan ka bhi tamasha kyon na ho

jaan hi Thahri baha-e-naz to ai dosto

chhoD kar zarron ko suraj hi ka sauda kyon na ho

jab kisi an-dekhi taqat par bharosa hai zarur

dahr walo phir KHuda hi ka bharosa kyon na ho