kyon shama jalai aaKHir-e-shab

ḳhush-āmdīd kahūñ kyā ye shab azaab kī hai

yahāñ milī ho jo manzil shikast-e-ḳhvāb kī

ye maiñ huuñ yā koī aañsū tumhārī palkoñ kā

ye tum ho yā koī uljhan mire shabāb kī hai

mire vajūd ko dekho na is tavajjoh se

ye āftāb nahīñ laash āftāb kī hai

tum āñsūoñ ko mirī jaan paḌh na pāogī

ye dāstāñ kisī bhīgī huī kitāb kī hai

na poñchho apne dupaTTe se merī peshānī

ye ḳhāk-e-rāh to sauġhāt inqalāb kī hai

shabāb chhoḌ gayā de ke ek dard-e-safar

ye yādgār isī kūcha-e-ḳharāb kī hai

ajiib soch meñ hai zindagī kā dorāhā

na ab sukūn kī sūrat na iztirāb kī hai

ye lab haiñ yā kisī guzrī huī bahār ke phuul

badan hai yā koī ḳhālī dukāñ sharāb kī hai

maiñ sun rahā huuñ tumhāre laboñ kī ḳhāmoshī

ġhazal ġhazal mire maazī ke intiḳhāb kī hai

bhaTak rahā huuñ maiñ is be-dilī ke sahrā meñ

jahāñ gunāh kā Dar hai na dhun savāb kī hai

tumhāre ruḳh pe hai ā.īna TūTne kā nishāñ

mahak mashām meñ sūkhe hue gulāb kī hai

ye tiis saal kī duurī ye ek roz kā qurb

sukūñ kā moḌ bhī tasvīr iztirāb kī hai

nadī ke sāmne khultā hai ghar kā darvāza

mire makān ke pīchhe galī sarāb kī hai

tumhārā dard mirī shā.erī ke kaam aaya

ye raushnī usī gum-gashta māhtāb kī hai

kahāñ se lā.ūñ sitāre jo tum ko nazr karūñ

ye shab to ruuh ke dāġhoñ ke ehtisāb kī hai

maiñ intizār meñ thā jab to haath chhoḌ diyā

yahāñ milī ho jo manzil shikast-e-ḳhvāb kī hai

maiñ āñsūoñ ko kahūñ kyā ki chhalke paḌte haiñ

ḳhush-āmdīd kahūñ kyā ki shab azaab kī hai

KHush-amdid kahun kya ye shab azab ki hai

yahan mili ho jo manzil shikast-e-KHwab ki

ye main hun ya koi aansu tumhaari palkon ka

ye tum ho ya koi uljhan mere shabab ki hai

mere wajud ko dekho na is tawajjoh se

ye aaftab nahin lash aaftab ki hai

tum aansuon ko meri jaan paDh na paogi

ye dastan kisi bhigi hui kitab ki hai

na ponchho apne dupaTTe se meri peshani

ye KHak-e-rah to saughat inqalab ki hai

shabab chhoD gaya de ke ek dard-e-safar

ye yaadgar isi kucha-e-KHarab ki hai

ajib soch mein hai zindagi ka doraha

na ab sukun ki surat na iztirab ki hai

ye lab hain ya kisi guzri hui bahaar ke phul

badan hai ya koi KHali dukan sharab ki hai

main sun raha hun tumhaare labon ki KHamoshi

ghazal ghazal mere mazi ke intiKHab ki hai

bhaTak raha hun main is be-dili ke sahra mein

jahan gunah ka Dar hai na dhun sawab ki hai

tumhaare ruKH pe hai aaina TuTne ka nishan

mahak masham mein sukhe hue gulab ki hai

ye tis sal ki duri ye ek roz ka qurb

sukun ka moD bhi taswir iztirab ki hai

nadi ke samne khulta hai ghar ka darwaza

mere makan ke pichhe gali sarab ki hai

tumhaara dard meri shaeri ke kaam aaya

ye raushni usi gum-gashta mahtab ki hai

kahan se laun sitare jo tum ko nazr karun

ye shab to ruh ke daghon ke ehtisab ki hai

main intizar mein tha jab to hath chhoD diya

yahan mili ho jo manzil shikast-e-KHwab ki hai

main aansuon ko kahun kya ki chhalke paDte hain

KHush-amdid kahun kya ki shab azab ki hai