kyun aaKHir mujhe shaitan kahte hain

kyuuñ āḳhir mujhe shaitān kahte haiñ

ye saare log

kyuuñ āḳhir mujhe shaitān kahte haiñ

agar ganjā koī ho sāmne chañdiyā chamaktī ho

to kyā ye dil nahīñ kahtā

chapat ik aadh jaḌne ko

hathelī jab khujātī hai

maiñ aisā kar guzartā huuñ

mirī building kā chaukīdār

so jaatā hai din meñ bhī

vo ḳharrāTe bhī letā hai

jo us kī naak par

ik tape chpkāne ko jī chāhe

maiñ aisā kar guzartā huuñ

paḌosan aunty kī

murġhiyāñ anDe jo detī haiñ

maiñ aksar sochtā huuñ

in se chūze kyuuñ nikalte haiñ

mirī ḳhvāhish ye hotī hai

unheñ maiñ toḌ kar dekhūñ

maiñ aisā kar guzartā huuñ

galī ke moḌ pe

baiThā huā moTā sā ik kuttā

agar dauḌe to kaisā ho

agar bhauñke to kaisā ho

paTāḳha us kī dum par bāñdh kar

māchis dikhāne ko

mirā jī chāhtā hai gar

maiñ aisā kar guzartā huuñ

buzurgo mujh ko batlāo

ye sab karne ko āḳhir kyā

kisī kā dil nahīñ kahtā

kyā maiñ sab se anokhā huuñ

ye sab shaitān karte haiñ

koī insāñ nahīñ kartā

ye saare log

kyuuñ āḳhir

mujhe shaitān kahte haiñ

kyun aaKHir mujhe shaitan kahte hain

ye sare log

kyun aaKHir mujhe shaitan kahte hain

agar ganja koi ho samne chandiya chamakti ho

to kya ye dil nahin kahta

chapat ek aadh jaDne ko

hatheli jab khujati hai

main aisa kar guzarta hun

meri building ka chaukidar

so jata hai din mein bhi

wo KHarraTe bhi leta hai

jo us ki nak par

ek tape chpkane ko ji chahe

main aisa kar guzarta hun

paDosan aunty ki

murghiyan anDe jo deti hain

main aksar sochta hun

in se chuze kyun nikalte hain

meri KHwahish ye hoti hai

unhen main toD kar dekhun

main aisa kar guzarta hun

gali ke moD pe

baiTha hua moTa sa ek kutta

agar dauDe to kaisa ho

agar bhaunke to kaisa ho

paTaKHa us ki dum par bandh kar

machis dikhane ko

mera ji chahta hai gar

main aisa kar guzarta hun

buzurgo mujh ko batlao

ye sab karne ko aaKHir kya

kisi ka dil nahin kahta

kya main sab se anokha hun

ye sab shaitan karte hain

koi insan nahin karta

ye sare log

kyun aaKHir

mujhe shaitan kahte hain