la bhi hai ek guman

tum ne kyā dekhā yahāñ kuchh bhī nahīñ

ham ne kyā paayā yahāñ kuchh bhī nahīñ

''be-kasī haa.e tamannā ki na duniyā hai na dīñ''

''lā'' se āġhāz fasāne kā huā

''lā'' se tahzīb zamāne kī huī

''lā'' kī tafsīr nahīñ hai mumkin

''lā'' hī se ishq kā āġhāz huā

ishq hai ek balā

ishq saffāk o havasnāk darīda-dāman

jis ke qadmoñ se bipharte hue dariyā umDe

jis kī āñkhoñ se dahakte hue hiire nikle

jis ke hāthoñ pe chamakte hue mahtāb utre

ishq vo aag ki jo aur jilā de jaa.e

ishq vo ḳhvāb ki jo niiñd uḌā le jaa.e

is qadar sarkash o saffāk ki bas

dasht-e-kāshān se dillī kā safar

''nigah-e-jalva-parast aur nafas-e-sidq-guzīñ''

ik ''ubhai-chand mire nāma-e-a.amāl meñ hai

ālam-e-kul ḳhvāb meñ hai

sañg-e-marmar kī usī masjid ke

surḳh zīnoñ pe lahū bahtā hai

aaj bhī kal kī tarah hañstā hai

kufr masjid meñ bahātā hai lahū

ishq sajde meñ kahe ''shukr-allāh''

shāhabād bhī tūfān meñ bahtā jaa.e

aur 'dārā' hai kisī soch meñ ġharq

masnad-e-adl sipah-sālār aur taḳht meñ ham-fikrī hai

ek hai ''mullā-qavī''

ek hai bas yahāñ ''ālamgīr''

aur maqtal meñ akelā 'sarmad'

ruḳh-e-tārīḳh badalne ko hai

us ke ash.ār hī se taḳht laraz jaatā hai

aaise advār ka.ī baar zamīñ par guzre

kaise talvār ne maftūh qalam karne ko

haath kaaTe haiñ zabāñ kaaTī hai sar kaaTe haiñ

ham ne dekhā hai khulī āñkhoñ se

aaj kī kaun kare ab ta.azīm

kal kī takzīb nahīñ ho saktī

raakh se ghar to nahīñ ban sakte

koh meñ dar to nahīñ ban sakte

ḳhvāb fariyād nahīñ kar sakte

ḳhvāb dekhā hai khulī āñkhoñ se

chāñd ko ḳhuuñ meñ nahāte ham ne

sar khule dasht ko mātam karte

aur mahallāt ko khañDaroñ meñ badalte dekhā

kizb ko adl kā har faisla karte dekhā

taḳht ko vaqt kā fir.aun bhī bante dekhā

zer-e-shamshīr ye 'sarmad' ne kahā hañste hue

''masnad-e-adl-o-musāvāt yahāñ kuchh bhī nahīñ

''lā'' bhī hai ek gumāñ

aur gumāñ kuchh bhī nahīñ''

tum ne kya dekha yahan kuchh bhi nahin

hum ne kya paya yahan kuchh bhi nahin

be-kasi hae tamanna ki na duniya hai na din

la se aaghaz fasane ka hua

la se tahzib zamane ki hui

la ki tafsir nahin hai mumkin

la hi se ishq ka aaghaz hua

ishq hai ek bala

ishq saffak o hawasnak darida-daman

jis ke qadmon se bipharte hue dariya umDe

jis ki aankhon se dahakte hue hire nikle

jis ke hathon pe chamakte hue mahtab utre

ishq wo aag ki jo aur jila de jae

ishq wo KHwab ki jo nind uDa le jae

is qadar sarkash o saffak ki bas

dasht-e-kashan se dilli ka safar

nigah-e-jalwa-parast aur nafas-e-sidq-guzin

ek ubhai-chand mere nama-e-amal mein hai

aalam-e-kul KHwab mein hai

sang-e-marmar ki usi masjid ke

surKH zinon pe lahu bahta hai

aaj bhi kal ki tarah hansta hai

kufr masjid mein bahata hai lahu

ishq sajde mein kahe shukr-allah

shahabaad bhi tufan mein bahta jae

aur 'dara' hai kisi soch mein gharq

masnad-e-adl sipah-salar aur taKHt mein ham-fikri hai

ek hai mulla-qawi

ek hai bas yahan aalamgir

aur maqtal mein akela 'sarmad'

ruKH-e-tariKH badalne ko hai

us ke ashaar hi se taKHt laraz jata hai

aaise adwar kai bar zamin par guzre

kaise talwar ne maftuh qalam karne ko

hath kaTe hain zaban kaTi hai sar kaTe hain

hum ne dekha hai khuli aankhon se

aaj ki kaun kare ab tazim

kal ki takzib nahin ho sakti

rakh se ghar to nahin ban sakte

koh mein dar to nahin ban sakte

KHwab fariyaad nahin kar sakte

KHwab dekha hai khuli aankhon se

chand ko KHun mein nahate hum ne

sar khule dasht ko matam karte

aur mahallat ko khanDaron mein badalte dekha

kizb ko adl ka har faisla karte dekha

taKHt ko waqt ka firaun bhi bante dekha

zer-e-shamshir ye 'sarmad' ne kaha hanste hue

masnad-e-adl-o-musawat yahan kuchh bhi nahin

la bhi hai ek guman

aur guman kuchh bhi nahin