la-intiha abhi

na jaane vo log gum kahāñ haiñ

chhalak rahī thī falak ke sāġhar se rahmat-e-haq kī tund sahbā

fazā-e-ayyām meñ mohabbat kī fāḳhtā.eñ bhī pankh phailā.e uḌ rahī thiiñ

dayār-e-hirmāñ meñ jhāñktī thiiñ umīd-e-fardā kī narm kirneñ

magar ye āshob-e-vaqt kā hai asar ki jis se

jhulas ga.e haiñ tasavvuroñ ke hasīn chehre

fazā bhī ḳhāmosh ruuh betāb duur mandir ke devtā chup

dhaḌakte dil kī ye sansanāhaT

khisakte pattoñ kī sarsarāhaT

kisī ke qadmoñ kī jaise aahaT

paḌe haiñ ḳhāmosh khokhle mandiroñ ke nāqūs

bujhe paḌe haiñ tamaddunoñ ke hasīn fānūs

yahāñ ajantā kā aur konārk kā fann-e-taḳhlīq hichkiyāñ le rahā hai paiham

yahāñ to ab saume'oñ meñ aur masjidoñ meñ ghar kar chuke haiñ taḳhrīb ke abābīl

nafas-nafas meñ ghuTan kā jazba

ragoñ meñ talḳhī hai zahr-e-ġham kī

bhaTakte rahne ko ab ḳhalā ke sivā nahīñ kuchh

ga.e the jo log is taraf se

unhīñ kā hai intizār ham ko

vo ā.eñge kab vo ā.eñge kab

yahāñ ahinsā ko ghun lagā hai

yahāñ mohabbat kī vādiyoñ meñ ugī hai kaa.ī

payām-e-insāniyat pe goyā lagī hai dīmak

vo dard-e-dil kī laveñ jo misl-e-charāġh jaltī rahī thiiñ sadiyoñ

na jaane kyoñ aaj bujh chukī haiñ

nazar ko dhuñdlā rahī hai kyoñ duur kī siyāhī

ga.e the kuchh log jo idhar se unhīñ kā hai intizār ham ko

falak ke lā-intihā abhī meñ

na jaane vo log gum kahāñ haiñ

na jaane wo log gum kahan hain

chhalak rahi thi falak ke saghar se rahmat-e-haq ki tund sahba

faza-e-ayyam mein mohabbat ki faKHtaen bhi pankh phailae uD rahi thin

dayar-e-hirman mein jhankti thin umid-e-farda ki narm kirnen

magar ye aashob-e-waqt ka hai asar ki jis se

jhulas gae hain tasawwuron ke hasin chehre

faza bhi KHamosh ruh betab dur mandir ke dewta chup

dhaDakte dil ki ye sansanahaT

khisakte patton ki sarsarahaT

kisi ke qadmon ki jaise aahaT

paDe hain KHamosh khokhle mandiron ke naqus

bujhe paDe hain tamaddunon ke hasin fanus

yahan ajanta ka aur konark ka fann-e-taKHliq hichkiyan le raha hai paiham

yahan to ab saume'on mein aur masjidon mein ghar kar chuke hain taKHrib ke ababil

nafas-nafas mein ghuTan ka jazba

ragon mein talKHi hai zahr-e-gham ki

bhaTakte rahne ko ab KHala ke siwa nahin kuchh

gae the jo log is taraf se

unhin ka hai intizar hum ko

wo aaenge kab wo aaenge kab

yahan ahinsa ko ghun laga hai

yahan mohabbat ki wadiyon mein ugi hai kai

payam-e-insaniyat pe goya lagi hai dimak

wo dard-e-dil ki lawen jo misl-e-charagh jalti rahi thin sadiyon

na jaane kyon aaj bujh chuki hain

nazar ko dhundla rahi hai kyon dur ki siyahi

gae the kuchh log jo idhar se unhin ka hai intizar hum ko

falak ke la-intiha abhi mein

na jaane wo log gum kahan hain