laik wek

maañ mujhe lorī sunā

lorī jo terā farz hai

aur biis barsoñ se

tire hoñToñ pe merā farz hai

biis barsoñ se

maiñ sukh kī niiñd so paaya nahīñ

mere zaḳhmīda papoToñ ko kisī lamhe ne

sahlāyā nahīñ

mere chāroñ samt

Thahrī raat jaltī jañg ke

maidān meñ

lāshoñ paTe khaliyān haiñ

rastoñ bhare saare nagar vīrān haiñ

aur maiñ kisī turbat kā patthar

maut kī gūñgī gavāhī

haar kī dahshat se ghabrāyā huā

tanhā sipāhī

us tabāhī ke sirhāne

sar-nigūñ nauha-ba-lab neza-ba-kaf

maañ ye mīrās-e-tamāshā

Dūbtī aahoñ karāhoñ kā ye shor-e-be-tahāshā

TūTtī sāñsoñ kī jhankāreñ

pukāreñ lāsha lāsha

kyā mire hone kī tāzīroñ meñ haiñ

kyā mire ajdād kī qabreñ bhī

zanjīroñ meñ haiñ

maañ agar aisā nahīñ to phir

ye tanhā.ī kī be-ḳhvābī

mirī taqdīr kī miTTī pe

kyuuñ gidh kī tarah baiThī huī hai

aur āḳhir kyuuñ

falak kī gol piilī aañkh ne

chāroñ taraf ābādiyoñ ko

ghar meñ kafnā diyā hai

maañ zamīneñ kyuuñ

ḳhalāoñ ke kafan oḌhe hue haiñ

kis liye mātam meñ Duube shahr

sar joḌe hue haiñ

mere andar aur bāhar kī zamīñ par

bāzuoñ Tāñgoñ saroñ chehroñ

laboñ ke an-ginat ambār haiñ

aur do āñkheñ mirī in sab kī pahre-dār haiñ

āñkheñ jo ab

be-ḳhvāboñ kī ret se bhar jā.eñgī

āñkheñ jo ab mar jā.eñgī

man mujhe lori suna

lori jo tera farz hai

aur bis barson se

tere honTon pe mera farz hai

bis barson se

main sukh ki nind so paya nahin

mere zaKHmida papoTon ko kisi lamhe ne

sahlaya nahin

mere chaaron samt

Thahri raat jalti jang ke

maidan mein

lashon paTe khaliyan hain

raston bhare sare nagar viran hain

aur main kisi turbat ka patthar

maut ki gungi gawahi

haar ki dahshat se ghabraya hua

tanha sipahi

us tabahi ke sirhane

sar-nigun nauha-ba-lab neza-ba-kaf

man ye miras-e-tamasha

Dubti aahon karahon ka ye shor-e-be-tahasha

TuTti sanson ki jhankaren

pukaren lasha lasha

kya mere hone ki taziron mein hain

kya mere ajdad ki qabren bhi

zanjiron mein hain

man agar aisa nahin to phir

ye tanhai ki be-KHwabi

meri taqdir ki miTTi pe

kyun gidh ki tarah baiThi hui hai

aur aaKHir kyun

falak ki gol pili aankh ne

chaaron taraf aabaadiyon ko

ghar mein kafna diya hai

man zaminen kyun

KHalaon ke kafan oDhe hue hain

kis liye matam mein Dube shahr

sar joDe hue hain

mere andar aur bahar ki zamin par

bazuon Tangon saron chehron

labon ke an-ginat ambar hain

aur do aankhen meri in sab ki pahre-dar hain

aankhen jo ab

be-KHwabon ki ret se bhar jaengi

aankhen jo ab mar jaengi