لاکھوں میں ایک مونٹو

ممی خفا ہیں ان کی سنتا نہیں ہے مونٹو

پاپا کو ہے شکایت پڑھتا نہیں ہے مونٹو

اور مونٹو میاں اب حیران سے کھڑے ہیں

سن سن کے ڈانٹ ان کے تو کان پک گئے ہیں

ہو فینٹم کہ ٹن ٹن یا ٹارزن کے قصے

کیا کیا نہیں پڑھا ہے کیا کیا نہیں وہ پڑھتے

اور اس پہ یہ شکایت پڑھتا نہیں ہے کچھ بھی

پڑھنا نہیں تو کیا ہے حد ہے زیادتی کی

کم آئے ہیں جو نمبر ایسا بھی کیا ہوا ہے

ہر بار آؤ اول یہ کس جگہ لکھا ہے

اپنی طرف سے پرچہ لکھا تھا ٹھیک یوں تو

اگزامنر سے شاید کچھ بھول ہو گئی ہو

اتنا بھی کیا بگڑنا کیا فیل ہو گئے ہیں

اس امتحان سے آگے سو امتحاں پڑے ہیں

کیا مونٹو میاں ہیں سب لوگ دیکھ لیں گے

ہر امتحاں میں اول اب آ کے ہم رہیں گے

ممی سہیلیوں میں بانٹیں گی تب مٹھائی

جو آج ڈانٹتے ہیں دیں گے وہ کل بدھائی

خوش ہو کے ایک اک سے کہتے پھریں گے پاپا

یہ اپنا مونٹو تو لاکھوں میں ایک نکلا