lal bag uD gaya

ta.ām-gāhoñ kī

bachī-khuchī ġhizā pe pal rahā thā

nam-zada shagāfoñ

ghun lage darāzoñ meñ

chhupā huā

vo mutma.in thā

ġhair-mar.ī nāliyoñ se

main hol tak

ġhalāzateñ bahā ke laane vaalī

sust o tez

saarī linoñ meñ ghūmtā thā

ek roz

hast kī girah meñ

us kī lāñbī Taañg

ik anokhe pech meñ ulajh ga.ī

to Tiis dard kī uThī

vajūd phaḌphaḌā gayā

jhaTak ke Taañg

pech se nikāl lī

to ek dam use lagā

ki us kī dastaras meñ par bhī haiñ

ajiib sāniya thā

pāniyoñ kī haul-nāk bū meñ

kiich kī umas meñ

donoñ vaqt mil rahe the

hāla-e-nafas meñ

dhīre dhīre us ke

sandalīñ sunahrī par bhī hil rahe the!

laal bag

jo shurūa din se

maut aur zindagī

safā.ī aur gandagī

nikāsī-e-vajūd

ḳhair o shar

ravānī o jumūd ke muāmalāt meñ ghirā huā thā

ḳhāk-rūboñ, mehtaroñ ke saath

kā.enātī moriyoñ zamānī bad-rūoñ meñ

rahte rahte tañg aa gayā thā

rāste ke biich hī se muḌ gayā

achānak ek roz

laal bag uḌ gayā!!

taam-gahon ki

bachi-khuchi ghiza pe pal raha tha

nam-zada shagafon

ghun lage daraazon mein

chhupa hua

wo mutmain tha

ghair-mari naliyon se

main hol tak

ghalazaten baha ke lane wali

sust o tez

sari linon mein ghumta tha

ek roz

hast ki girah mein

us ki lanbi Tang

ek anokhe pech mein ulajh gai

to Tis dard ki uThi

wajud phaDphaDa gaya

jhaTak ke Tang

pech se nikal li

to ek dam use laga

ki us ki dastaras mein par bhi hain

ajib saniya tha

paniyon ki haul-nak bu mein

kich ki umas mein

donon waqt mil rahe the

haala-e-nafas mein

dhire dhire us ke

sandalin sunahri par bhi hil rahe the!

lal bag

jo shurua din se

maut aur zindagi

safai aur gandagi

nikasi-e-wajud

KHair o shar

rawani o jumud ke muamalat mein ghira hua tha

KHak-rubon, mehtaron ke sath

kaenati moriyon zamani bad-ruon mein

rahte rahte tang aa gaya tha

raste ke bich hi se muD gaya

achanak ek roz

lal bag uD gaya!!