lal-bahadur-shastari

shahīd-e-qaum hai koī koī shahīd-e-vatan

bajā hai tujh ko kahūñ maiñ agar shahīd-e-vatan

talāsh-e-amn meñ dillī se tāshqand gayā

kise ḳhabar thī ki bāñdhe huā thā sar se kafan

payām-e-amn diyā jārhān-e-ālam ko

gayā sañvār ke duniyā kī zindagī kā chalan

kise majāl tirī baat koī kaaT sake

dalīl terī mo.assir to pur asar hai suḳhan

miThās baat meñ aisī ki raam ahl-e-jahāñ

tirī zabān thī qand-o-nabāt kā maḳhzan

thī ustuvār mohabbat terī dostī kī asaas

fazā-e-dahr meñ koī na thā tirā dushman

tū ek banda-e-darvesh thā faqīr-manash

chalā gayā jo zamāne se jhaaḌ kar dāman

tire ḳhulūs kā qaa.il hai sadr-e-pākistāñ

kahāñ se sīkhā thā tū ne ye guftugū kā fan

zamāne-bhar meñ huā har taraf tirā mātam

muhīt saare jahāñ ko hue haiñ rañj-o-mehan

qubūl ham ko kiye tū ne jis qadar paimāñ

hai terī ruuh hamāre diloñ pe sāya-fagan

hai sharq-o-ġharb meñ qaa.il har ek shaḳhs tirā

vazīfa-ḳhvāñ-o-sanā-gar tire shumāl-o-dakan

shahid-e-qaum hai koi koi shahid-e-watan

baja hai tujh ko kahun main agar shahid-e-watan

talash-e-amn mein dilli se tashqand gaya

kise KHabar thi ki bandhe hua tha sar se kafan

payam-e-amn diya jarhan-e-alam ko

gaya sanwar ke duniya ki zindagi ka chalan

kise majal teri baat koi kaT sake

dalil teri moassir to pur asar hai suKHan

miThas baat mein aisi ki ram ahl-e-jahan

teri zaban thi qand-o-nabaat ka maKHzan

thi ustuwar mohabbat teri dosti ki asas

faza-e-dahr mein koi na tha tera dushman

tu ek banda-e-darwesh tha faqir-manash

chala gaya jo zamane se jhaD kar daman

tere KHulus ka qail hai sadr-e-pakistan

kahan se sikha tha tu ne ye guftugu ka fan

zamane-bhar mein hua har taraf tera matam

muhit sare jahan ko hue hain ranj-o-mehan

qubul hum ko kiye tu ne jis qadar paiman

hai teri ruh hamare dilon pe saya-fagan

hai sharq-o-gharb mein qail har ek shaKHs tera

wazifa-KHwan-o-sana-gar tere shumal-o-dakan