lapata

kyā tum bhī kal se lāpatā ho

shahr-e-hazīñ ke har qarye meñ

merī gumshudagī kī ḳhabar

kisī be-mausamī āñdhī kī tarah chal rahī hai

raaj nagar ke raaja ne merī talāsh meñ

apne payāde dauḌā diye haiñ

aur bastī ke sabhī purohit merī havelī ke bāhar mātam-kunāñ haiñ

kal shaam ke jhuTpuTe meñ raat girne se pahle

ham donoñ ko haath thāme barf-zāroñ meñ chalte kisī ne nahīñ dekhā

aur maiñ ne apnī khiḌkī se duur pahāḌoñ ke pīchhe ojhal hote sūraj ko tanhā dekhā

us kī āḳhirī kiran merī hathelī par aag kī tarah jalne lagī

to mere ranjīda dil ne tumheñ yaad kiyā

aur is udāsī meñ maiñ ne ḳhud ko mohabbat se sarshār paayā

mujhe lagā tumhārī niilī āstīñ kā button

mere bāloñ se ulajh paḌā hai

aur mere joḌe se ek motī TuuT ke girā hai

mujhe yuuñ lagā jhiil ke billorīñ pāniyoñ meñ

mere chehre pe tumhārā aks paḌā hai

agar vo tum nahīñ the to aur kaun thā

vo jo bhī thā mujh se kah rahā thā

kyā tum bhī kal se lāpata ho

merī talāsh kī nishān-dahī meñ log batā rahe haiñ

ki tum ko āḳhirī baar kahāñ sunā dekhā gayā

kyā kisī ne raaja ko batā diyā

ki tum ko āḳhirī baar

urdu zabāñ meñ sher kahte

merī āñkhoñ ke ābgīnoñ meñ dekhā gayā

kya tum bhi kal se lapata ho

shahr-e-hazin ke har qarye mein

meri gumshudagi ki KHabar

kisi be-mausami aandhi ki tarah chal rahi hai

raj nagar ke raja ne meri talash mein

apne payaade dauDa diye hain

aur basti ke sabhi purohit meri haweli ke bahar matam-kunan hain

kal sham ke jhuTpuTe mein raat girne se pahle

hum donon ko hath thame barf-zaron mein chalte kisi ne nahin dekha

aur main ne apni khiDki se dur pahaDon ke pichhe ojhal hote suraj ko tanha dekha

us ki aaKHiri kiran meri hatheli par aag ki tarah jalne lagi

to mere ranjida dil ne tumhein yaad kiya

aur is udasi mein main ne KHud ko mohabbat se sarshaar paya

mujhe laga tumhaari nili aastin ka button

mere baalon se ulajh paDa hai

aur mere joDe se ek moti TuT ke gira hai

mujhe yun laga jhil ke billorin paniyon mein

mere chehre pe tumhaara aks paDa hai

agar wo tum nahin the to aur kaun tha

wo jo bhi tha mujh se kah raha tha

kya tum bhi kal se lapata ho

meri talash ki nishan-dahi mein log bata rahe hain

ki tum ko aaKHiri bar kahan suna dekha gaya

kya kisi ne raja ko bata diya

ki tum ko aaKHiri bar

urdu zaban mein sher kahte

meri aankhon ke aabginon mein dekha gaya