lapata

maiñ lāpatā ho gayā huuñ

ka.ī hafte hue

police ko report likhvā.e

tab se roz thāne jaatā huuñ

havaldār se pūchhtā huuñ

merā kuchh patā chalā

hamdard police afsar māyūsī se sar hilātā hai

phañsī phañsī āvāz meñ kahtā hai

abhī tak tumhārā kuchh surāġh nahīñ milā

phir vo tasallī detā hai

kisī na kisī din

tum mil hī jāoge

behosh

kisī saḌak ke kināre

yā burī tarah zaḳhmī

kisī aspatāl meñ

yā laash kī sūrat

kisī nadī meñ

merī āñkhoñ meñ aañsū aa jaate haiñ

maiñ bāzār chalā jaatā huuñ

apnā istiqbāl karne ke liye

gul-farosh se phuul ḳharīdtā huuñ

apne zaḳhmoñ ke liye

chemist se

marham-paTTī kā sāmān

thoḌī ruuī

aur dard-kushā goliyāñ

apnī āḳhirī rusūmāt ke liye

masjid kī dukān se ek kafan

aur apnī yaad manāne ke liye

ka.ī mom-battiyāñ

kuchh log kahte haiñ

kisī ke marne par

mom-battī nahīñ jalānī chāhiye

lekin vo ye nahīñ batāte

ki aañkh kā taara lāpatā ho jaa.e

to raushnī kahāñ se laa.eñ

ghar kā charāġh bujh jaa.e

to phir kyā jalā.eñ

main lapata ho gaya hun

kai hafte hue

police ko report likhwae

tab se roz thane jata hun

hawaldar se puchhta hun

mera kuchh pata chala

hamdard police afsar mayusi se sar hilata hai

phansi phansi aawaz mein kahta hai

abhi tak tumhaara kuchh suragh nahin mila

phir wo tasalli deta hai

kisi na kisi din

tum mil hi jaoge

behosh

kisi saDak ke kinare

ya buri tarah zaKHmi

kisi aspatal mein

ya lash ki surat

kisi nadi mein

meri aankhon mein aansu aa jate hain

main bazar chala jata hun

apna istiqbaal karne ke liye

gul-farosh se phul KHaridta hun

apne zaKHmon ke liye

chemist se

marham-paTTi ka saman

thoDi rui

aur dard-kusha goliyan

apni aaKHiri rusumat ke liye

masjid ki dukan se ek kafan

aur apni yaad manane ke liye

kai mom-battiyan

kuchh log kahte hain

kisi ke marne par

mom-batti nahin jalani chahiye

lekin wo ye nahin batate

ki aankh ka tara lapata ho jae

to raushni kahan se laen

ghar ka charagh bujh jae

to phir kya jalaen