لب دریاے سخن پر

دریائے سخن عشق کے نشے میں رواں ہے

سبزہ ہے گلستان تصور کے کنارے

مدہوش روانی میں مری فکر نہاں ہے

مسحور ہیں موجوں کے ترنم سے کنارے

یہ وقت سحر باد صبا دھند کی چادر

لگتا ہے کہ شبنم ابھی اتری ہے گلوں پر

رقصاں ہیں سر راہ کئی شاخ صنوبر

کچھ دیر میں نکلے گا اجالوں کا پیمبر

مشرق سے خداداد شعاعوں کو پہن کر

مائل بہ تخیل ہے ابھی طبع سخنور

تم نور کا پیکر ہو تمہیں نظم میں ڈھالوں

کچھ روشنی پڑ جائے تمہاری مرے فن پر

میں چشم تحیر سے تمہیں دیکھ رہا ہوں

تم بیٹھی ہوئی ہو لب دریاے سخن پر