lab-e-dariya-e-suKHan par

dariyā-e-suḳhan 'ishq ke nashshe meñ ravāñ hai

sabza hai gulistān-e-tasavvur ke kināre

mad.hosh ravānī meñ mirī fikr nihāñ hai

mas.hūr haiñ maujoñ ke tarannum se kināre

ye vaqt-e-sahar bād-e-sabā dhund kī chādar

lagtā hai ki shabnam abhī utrī hai guloñ par

raqsāñ haiñ sar-e-rāh ka.ī shāḳh-e-sanobar

kuchh der meñ niklegā ujāloñ kā payambar

mashriq se ḳhudā-dād shu'ā'oñ ko pahan kar

mā.il-ba-taḳhayyul hai abhī tab'-e-suḳhanvar

tum nuur kā paikar ho tumheñ nazm meñ Dhālūñ

kuchh raushnī paḌ jaa.e tumhārī mire fan par

maiñ chashm-e-tahayyur se tumheñ dekh rahā huuñ

tum baiThī huī ho lab-e-dariyā-e-suḳhan par

dariya-e-suKHan 'ishq ke nashshe mein rawan hai

sabza hai gulistan-e-tasawwur ke kinare

madhosh rawani mein meri fikr nihan hai

mashur hain maujon ke tarannum se kinare

ye waqt-e-sahar baad-e-saba dhund ki chadar

lagta hai ki shabnam abhi utri hai gulon par

raqsan hain sar-e-rah kai shaKH-e-sanobar

kuchh der mein niklega ujalon ka payambar

mashriq se KHuda-dad shu'a'on ko pahan kar

mail-ba-taKHayyul hai abhi tab'-e-suKHanwar

tum nur ka paikar ho tumhein nazm mein Dhaalun

kuchh raushni paD jae tumhaari mere fan par

main chashm-e-tahayyur se tumhein dekh raha hun

tum baiThi hui ho lab-e-dariya-e-suKHan par