lab-e-tanur

maiñ aksar raat kī tanhā.ī se ye pūchhtā huuñ

ki merā aaj mere kal se kyūñkar muḳhtalif hai

vahī maiñ huuñ vahī dīvāngī hai

vahī vahshat vahī fikr-e-ma.īshat

ye bechainī ye vīrānī

mujhe kyuuñ khaa.e jaatī hai

magar jazboñ se aarī dard se ġhāfil ye tanhā.ī

sadā ḳhāmosh rahtī hai

mujhe lagtā hai tanhā.ī

faqat bahrī nahīñ gūñgī bhī hai shāyad

vahī gambhīr sannāTā vahī vīrān tārīkī

bhalā tanhā.ī bhī kuchh boltī hai

magar badlī se aksar

chāñd apnā sar nikāle

mujhe āvāz de kar pūchhtā hai

ki dīvāne tū ab tak jāgtā hai

ye kaisī fikr-e-roz-o-shab

ye kaisī girya-zārī

sulagtī dhīme dhīme

raakh bantī raat

āḳhir kaT hī jā.egī

magar tū koī tājir hai

na sāhūkār na baniyā

to phir kyuuñ āj-kal meñ bāñTtā hai

dard kī daulat

ye vo saudā nahīñ

jo har kisī ko raas aa jaa.e

kaThin ho yā pur-āsā.ish magar ye raat guzregī

''shab-e-simvar guzasht lab-e-tanūr guzasht

main aksar raat ki tanhai se ye puchhta hun

ki mera aaj mere kal se kyunkar muKHtalif hai

wahi main hun wahi diwangi hai

wahi wahshat wahi fikr-e-maishat

ye bechaini ye virani

mujhe kyun khae jati hai

magar jazbon se aari dard se ghafil ye tanhai

sada KHamosh rahti hai

mujhe lagta hai tanhai

faqat bahri nahin gungi bhi hai shayad

wahi gambhir sannaTa wahi viran tariki

bhala tanhai bhi kuchh bolti hai

magar badli se aksar

chand apna sar nikale

mujhe aawaz de kar puchhta hai

ki diwane tu ab tak jagta hai

ye kaisi fikr-e-roz-o-shab

ye kaisi girya-zari

sulagti dhime dhime

rakh banti raat

aaKHir kaT hi jaegi

magar tu koi tajir hai

na sahukar na baniya

to phir kyun aaj-kal mein banTta hai

dard ki daulat

ye wo sauda nahin

jo har kisi ko ras aa jae

kaThin ho ya pur-asaish magar ye raat guzregi

shab-e-simwar guzasht lab-e-tanur guzasht