labbaik

sannāToñ kā shab-ḳhūñ hai

havā ke naTkhaT tāroñ par

duur kahīñ kuchh āvāzoñ kī sargoshī hai

ye nā-fahm sadā.eñ

kabhī madhur sā-re-gā-mā-pā-dhā-nī-sā haiñ

kabhī pighaltā siisa haiñ

chāroñ jānib sail-e-havā hai

magar ḳhalā hai

ḳhushbū rang na taare meñ

tishna-gosh adam-e-samā.at ke maare haiñ

dhuñdle ḳhvāb dekhne kī chāhat meñ haare haiñ

āñkheñ do angāre haiñ

sannāToñ kā shab-ḳhūñ hai

dard kī sūiyāñ Tik-Tik Tik-Tik kartī haiñ

palkeñ hilne julne se bhī Dartī haiñ

sāñseñ aaheñ bhartī haiñ

ik nuqte par saarā aalam simaT gayā hai

yuuñ lagtā hai

saañp kisī nevle ke badan se lipaT gayā hai

nā-umīdī aur ummīd kī chaukhaT par

kaun kisī bhiḌ ke chhatte ko haath lagā.e

duur kī āvāzeñ suljhā.e

niiñd jagā.e

sannāToñ kā shab-ḳhūñ hai

aur añdhere ghup meñ

ḳhāmoshī kī guuñj hai gahrī chup meñ

sub.h kī pahlī kiran nigāhoñ se ojhal hai

nafas nafas bojhal hai

bas ik dhaḌkan kī dastak hai jis kī sadā par

dil labbaik kahe jaatā hai

raushniyoñ kī añgḌā.ī tak

dil labbaik kahe jā.egā

sannaTon ka shab-KHun hai

hawa ke naTkhaT taron par

dur kahin kuchh aawazon ki sargoshi hai

ye na-fahm sadaen

kabhi madhur sa-re-ga-ma-pa-dha-ni-sa hain

kabhi pighalta sisa hain

chaaron jaanib sail-e-hawa hai

magar KHala hai

KHushbu rang na tare mein

tishna-gosh adam-e-samaat ke mare hain

dhundle KHwab dekhne ki chahat mein haare hain

aankhen do angare hain

sannaTon ka shab-KHun hai

dard ki suiyan Tik-Tik Tik-Tik karti hain

palken hilne julne se bhi Darti hain

sansen aahen bharti hain

ek nuqte par sara aalam simaT gaya hai

yun lagta hai

sanp kisi newle ke badan se lipaT gaya hai

na-umidi aur ummid ki chaukhaT par

kaun kisi bhiD ke chhatte ko hath lagae

dur ki aawazen suljhae

nind jagae

sannaTon ka shab-KHun hai

aur andhere ghup mein

KHamoshi ki gunj hai gahri chup mein

subh ki pahli kiran nigahon se ojhal hai

nafas nafas bojhal hai

bas ek dhaDkan ki dastak hai jis ki sada par

dil labbaik kahe jata hai

raushniyon ki angDai tak

dil labbaik kahe jaega