لیکاڈائسیکل

اب وہ

گھر کے ہر کونے سے

ڈرائنگ روم کے عیش ٹرے سے

کچن میں کوڑے کے ڈبے سے

جہاں کہیں بھی

بجھی ہوئی ماچس کی تیلی

مل جائے چنتا رہتا ہے

اور کسی تنہا گوشے میں

ماچس کی اک اک تیلی کو

باری باری

اپنی آنکھوں کے آگے رکھتا ہے

ایسے میں اس شخص کی سانسیں

تیز تیز چلنے لگتی ہیں

آنکھیں شعلہ ہو جاتی ہیں

پھر وہ

ماچس کی بجھی ہوئی ہر اک تیلی کو

زور زور سے

دانتوں سے کچلا کرتا ہے

اور ایسے میں

گھر کا کوئی فرد نظر آ جائے

تو پہلے ہنس دیتا ہے

ہنستے ہنستے رو پڑتا ہے

دیر دیر تک

زار زار روتا رہتا ہے