laDki aur baadal

laḌkī ke paas

ek kitāb hai aur

kitāb ke paas ek kahānī

kahānī meñ yak añdherī raat hai aur

añdherī raat meñ ek ḳhvāb

laḌkī ke paas

ek ḳhvāb hai aur

ḳhvāb ke paas ek be-rañg kuttā aur gulābī bādal

kuttā laḌkī ke paas aatā hai

vo Dar jaatī hai aur

āñkheñ khol detī hai

laḌkī ke paas kuchh nahīñ hai

vo rone lagtī hai aur kahtī hai

mere paas

āñsuoñ se banā huā

ek bādal hai

aur hamesha

bādal ke saath saath chaltī rahtī hai

laDki ke pas

ek kitab hai aur

kitab ke pas ek kahani

kahani mein yak andheri raat hai aur

andheri raat mein ek KHwab

laDki ke pas

ek KHwab hai aur

KHwab ke pas ek be-rang kutta aur gulabi baadal

kutta laDki ke pas aata hai

wo Dar jati hai aur

aankhen khol deti hai

laDki ke pas kuchh nahin hai

wo rone lagti hai aur kahti hai

mere pas

aansuon se bana hua

ek baadal hai

aur hamesha

baadal ke sath sath chalti rahti hai