lafz likhna bhul jata hun

mujhe uḌte parinde achchhe lagte haiñ

mujhe un kī uḌānoñ se

na.e aate hue sab mausamoñ kī āhaTeñ mahsūs hotī haiñ

mujhe un kī uḌāneñ

bārisheñ aur phuul khilne kī bashārat dene aatī haiñ

mujhe un kī uḌāneñ

zindagī ke rāstoñ par hausloñ kā dars detī haiñ

mire hāthoñ ne harfoñ ke gulāboñ ko

inhī se likhnā sīkhā hai

magar hijrat-zada mausam meñ

jab koī akelī kuuñj kar laatī huī

niile falak kī vus.atoñ meñ apne kho.e sāthiyoñ ko

DhūñDhtī āvāz detī hai

mujhe bichhḌe hue sab yaad aate haiñ

mire hāthoñ kī poreñ lafz likhnā bhuul jaatī haiñ

zamīñ par bārisheñ

aur sard yaḳh-basta badan ko chīrtī barham havā.eñ

sabz peḌoñ meñ ghire ābād ghar kā rāsta rokeñ

maiñ tanhā baiTh kar

bhīge parindoñ ke paroñ ke

ḳhushk hone kī duā.eñ māñgtā huuñ!

mujhe uDte parinde achchhe lagte hain

mujhe un ki uDanon se

nae aate hue sab mausamon ki aahaTen mahsus hoti hain

mujhe un ki uDanen

barishen aur phul khilne ki bashaarat dene aati hain

mujhe un ki uDanen

zindagi ke raston par hauslon ka dars deti hain

mere hathon ne harfon ke gulabon ko

inhi se likhna sikha hai

magar hijrat-zada mausam mein

jab koi akeli kunj kar lati hui

nile falak ki wusaton mein apne khoe sathiyon ko

DhunDhti aawaz deti hai

mujhe bichhDe hue sab yaad aate hain

mere hathon ki poren lafz likhna bhul jati hain

zamin par barishen

aur sard yaKH-basta badan ko chirti barham hawaen

sabz peDon mein ghire aabaad ghar ka rasta roken

main tanha baiTh kar

bhige parindon ke paron ke

KHushk hone ki duaen mangta hun!