lafz paron ki tarah hote hain

tamām din tumhāre messages mere dil kī muñDeroñ par kabūtaroñ kī tarah utarte haiñ

safed dūdhiyā siyāh chashm sharbatī aur surma.ī maa.il jañgalī kabūtar jin ke siine ke baal

ka.ī rangoñ meñ damakte haiñ

sabz-gūñ nīlgūñ aur tābdār tapte hue tāñbe ke jaise

maiñ un kī zabān samajhtī huuñ

ġhuTarġhūñ ġhuTarġhūñ

kitnī parvāz kar ke aate haiñ

shaam se maiñ un ke saath

ek kābuk meñ band ho jaatī huuñ

vo mere bāzuoñ kandhoñ aur mere sar par baiTh jaate haiñ

mujhe sub.h tak sone nahīñ dete

un ke par sehr-añgez lafzoñ kī tarah

apne ma.ānī kholte haiñ

tumheñ mālūm hai par lafzoñ kī tarah hote haiñ khulte haiñ ma.ānī kī tarah

tah-dar-tah

alāmateñ

ramz-nigārī

aur ishāre kinā.e sab kuchh

aur ye lafz apne saath nī۔ndeñ uḌā kar le jaate haiñ

raat merī nīñdeñ le kar galī meñ

sīTiyāñ mārtī hai

aur ḳhvāb khiḌkiyoñ par dastakeñ dete haiñ

tum apnī karvaT badalte ho

aur raat apnī poshāk

maiñ un ke pairoñ meñ

motiyoñ vaalī jhāñjhareñ Dāltī huuñ

ye apnā apnā daana dunkā chug kar

tumhārī or uḌ jaate haiñ

aur phir ek na.ī Daar utartī hai

tamam din tumhaare messages mere dil ki munDeron par kabutaron ki tarah utarte hain

safed dudhiya siyah chashm sharbati aur surmai mail jangali kabutar jin ke sine ke baal

kai rangon mein damakte hain

sabz-gun nilgun aur tabdar tapte hue tanbe ke jaise

main un ki zaban samajhti hun

ghuTarghun ghuTarghun

kitni parwaz kar ke aate hain

sham se main un ke sath

ek kabuk mein band ho jati hun

wo mere bazuon kandhon aur mere sar par baiTh jate hain

mujhe subh tak sone nahin dete

un ke par sehr-angez lafzon ki tarah

apne maani kholte hain

tumhein malum hai par lafzon ki tarah hote hain khulte hain maani ki tarah

tah-dar-tah

alamaten

ramz-nigari

aur ishaare kinae sab kuchh

aur ye lafz apne sath ni۔nden uDa kar le jate hain

raat meri ninden le kar gali mein

siTiyan marti hai

aur KHwab khiDkiyon par dastaken dete hain

tum apni karwaT badalte ho

aur raat apni poshak

main un ke pairon mein

motiyon wali jhanjharen Dalti hun

ye apna apna dana dunka chug kar

tumhaari or uD jate hain

aur phir ek nai Dar utarti hai