lafz

jab lafz chalnā chāhte haiñ

chalte haiñ aur dūsre lafzoñ ke

pīchhe chalnā shurūa kar dete haiñ

ek ke pīchhe ek

lafz chalte rahte haiñ

lafz ek-dūsre ke pīchhe

pāgaloñ kī tarah nahīñ dauḌte

lafz āhista āhista chalte haiñ

apne chalne ke daurān lafz

ek-dūsre par miTTī nahīñ uchhālte

ek-dūsre par paanī nahīñ pheñkte

lafz dūsre lafzoñ ko kīchaḌ meñ nahīñ girāte

lafz

dūsre chhoTe chhoTe lafzoñ ko

dhakke nahīñ dete

aage jaane vaale lafz

pīchhe aane vaale lafzoñ kā

rāsta nahīñ rokte

ḳhālī haath

lafz chalte chale jaate haiñ

un ke paas aḳhroT kī lakḌī se banī

lohe ke daste vaalī koī chhaḌī nahīñ hotī

na hī koī bandūq

lafz lafzoñ ko

bahut ziyāda Darāte nahīñ

lafz dūsre lafzoñ ko sahārā dete haiñ

zinda rakhte haiñ

lafz kisī lafz ko

aadmī kī tarah

añdhere meñ le jā kar

us kā galā nahīñ ghoñTte

vo ek dūsre ko raushnī meñ rakh kar

hamesha apnī apnī āvāz buland karte hue

aage baḌhte rahte haiñ

chalte rahī rahte haiñ

jab lafz chalna chahte hain

chalte hain aur dusre lafzon ke

pichhe chalna shurua kar dete hain

ek ke pichhe ek

lafz chalte rahte hain

lafz ek-dusre ke pichhe

pagalon ki tarah nahin dauDte

lafz aahista aahista chalte hain

apne chalne ke dauran lafz

ek-dusre par miTTi nahin uchhaalte

ek-dusre par pani nahin phenkte

lafz dusre lafzon ko kichaD mein nahin giraate

lafz

dusre chhoTe chhoTe lafzon ko

dhakke nahin dete

aage jaane wale lafz

pichhe aane wale lafzon ka

rasta nahin rokte

KHali hath

lafz chalte chale jate hain

un ke pas aKHroT ki lakDi se bani

lohe ke daste wali koi chhaDi nahin hoti

na hi koi banduq

lafz lafzon ko

bahut ziyaada Daraate nahin

lafz dusre lafzon ko sahaara dete hain

zinda rakhte hain

lafz kisi lafz ko

aadmi ki tarah

andhere mein le ja kar

us ka gala nahin ghonTte

wo ek dusre ko raushni mein rakh kar

hamesha apni apni aawaz buland karte hue

aage baDhte rahte hain

chalte rahi rahte hain