lafzon ka almiya

na.e na.e lafz shor karte

baḌhe chale aa rahe haiñ

fikr o ḳhayāl kī rahguzar ābād ho rahī hai

zabāñ bahut sī purānī had-bandiyoñ se āzād ho rahī hai

ka.ī fasāne jo an-kahe the ka.ī tasavvur jo be-zabāñ the

hazār aalam nashāt o ġham ke jo pahle nā-qābil-e-bayāñ the

vo dhaḌkaneñ ḳhāmushī hī jin ke ḳharosh-e-pinhāñ kī tarjumāñ thī

vo naġhmagī jo ḳhamoshiyoñ ke siyāh zindāñ meñ par-fishāñ thī

use ab āḳhir khulī fazāoñ meñ izn-e-parvāz mil gayā hai

ki ik nayā rishta darmiyān-e-ḳhayāl-o-āvāz mil gayā hai

magar mujhe chup sī lag ga.ī hai

na.e na.e lafz shor karte baḌhe chale aa rahe haiñ

aur maiñ

hujūm-e-pur-shor meñ akelā

purāne lafzoñ ko DhūñDtā huuñ

ye dekhtā huuñ

jahāñ jahāñ kal purāne lafzoñ ne Daal rakkhe the apne Dere

vahāñ na.e lafz aa ke ābād ho ga.e haiñ

makāñ agarche ujaḌ na paa.e makīn barbād ho ga.e haiñ

na.e na.e lafz shor karte baḌhe chale aa rahe haiñ

lekin

purāne lafzoñ kī pā.emālī ne dam ba-ḳhud kar diyā hai mujh ko

kisī ne sochā nahīñ hai shāyad magar maiñ aksar ye sochtā huuñ

purāne lafzoñ ke saath hī ik purānī duniyā bhī kho ga.ī hai

ḳhāmoshiyoñ ke siyāh-zindāñ meñ jā ke rū-posh ho ga.ī hai

nae nae lafz shor karte

baDhe chale aa rahe hain

fikr o KHayal ki rahguzar aabaad ho rahi hai

zaban bahut si purani had-bandiyon se aazad ho rahi hai

kai fasane jo an-kahe the kai tasawwur jo be-zaban the

hazar aalam nashat o gham ke jo pahle na-qabil-e-bayan the

wo dhaDkanen KHamushi hi jin ke KHarosh-e-pinhan ki tarjuman thi

wo naghmagi jo KHamoshiyon ke siyah zindan mein par-fishan thi

use ab aaKHir khuli fazaon mein izn-e-parwaz mil gaya hai

ki ek naya rishta darmiyan-e-KHayal-o-awaz mil gaya hai

magar mujhe chup si lag gai hai

nae nae lafz shor karte baDhe chale aa rahe hain

aur main

hujum-e-pur-shor mein akela

purane lafzon ko DhunDta hun

ye dekhta hun

jahan jahan kal purane lafzon ne Dal rakkhe the apne Dere

wahan nae lafz aa ke aabaad ho gae hain

makan agarche ujaD na pae makin barbaad ho gae hain

nae nae lafz shor karte baDhe chale aa rahe hain

lekin

purane lafzon ki paemali ne dam ba-KHud kar diya hai mujh ko

kisi ne socha nahin hai shayad magar main aksar ye sochta hun

purane lafzon ke sath hi ek purani duniya bhi kho gai hai

KHamoshiyon ke siyah-zindan mein ja ke ru-posh ho gai hai