lafzon ke khel

lafzoñ ke khel bahut ajiib hote haiñ

kabhī āsamān par le jaate haiñ

aur kabhī zamīn par de mārte haiñ

ye kapḌoñ ke rañgoñ se ziyāda

kabhī bahut gahre

kabhī bahut halke

suroñ meñ

dhīme dhīme

ḳhuun sairāb karte haiñ

aur kabhī ek ek qatra nichoḌ lete haiñ

ye ārām-deh bistar par ham se ham-bistarī karte haiñ

aur kabhī hamārī āñval naal se chipak jaate haiñ

aur jab tak ham zinda rahte haiñ

ye hameñ loriyāñ dete haiñ

aur kabhī hameñ achānak mar jaane par

majbūr karte haiñ

aur ye lafz hī elaan karte haiñ

ki kis jagah kis tārīḳh ko

ham kahāñ murda hālat meñ paa.e ga.e

lafzon ke khel bahut ajib hote hain

kabhi aasaman par le jate hain

aur kabhi zamin par de marte hain

ye kapDon ke rangon se ziyaada

kabhi bahut gahre

kabhi bahut halke

suron mein

dhime dhime

KHun sairab karte hain

aur kabhi ek ek qatra nichoD lete hain

ye aaram-deh bistar par hum se ham-bistari karte hain

aur kabhi hamari aanwal nal se chipak jate hain

aur jab tak hum zinda rahte hain

ye hamein loriyan dete hain

aur kabhi hamein achanak mar jaane par

majbur karte hain

aur ye lafz hi elan karte hain

ki kis jagah kis tariKH ko

hum kahan murda haalat mein pae gae