laghzish

jhilmilā kar bujh ga.e pāgal ummīdoñ ke diye

tū samajhtī hai ki maiñ huuñ aaj tak andohgīñ

vaqt ke hāthoñ ne āḳhir mundamil kar hī diyā

ab mire ma.asūm zaḳhmoñ se lahū bahtā nahīñ

jab hinā.ī uñgliyoñ kī juñbisheñ aatī haiñ yaad

jazb kar letā huuñ āñkhoñ kī juñbisheñ aatī haiñ yaad

ab magar maazī kī har shai par añdherā chhā gayā

aur hī rāhoñ se guzartī jā rahī hai zindagī

zehn meñ ubhre hue haiñ chand be-jā se nuqūsh

aur un meñ bhī nahīñ hai koī rabt-e-bāhamī

ḳhvāb dekhā thā kisī dāman kī chhāñv meñ kabhī

ek aisā ḳhvāb jis kā mudda.ā koī nahīñ

maiñ akelā jā rahā huuñ aur zamīñ hai sañglāḳh

ajnabī vaadī meñ merā āshnā koī nahīñ

rāste kaTte hue gum ho ga.e haiñ dhuñd meñ

dhuñd se aage ḳhalā hai rāsta koī nahīñ

ye bhayānak ḳhvāb kyoñ maġhlūb karte haiñ mujhe

dūdhiyā rāteñ sahar ke jhuTpuTe meñ kho ga.iiñ

aur terī narm bāheñ mujh se ab nā-āshnā

aur hī gardan ke halqe meñ lipaT kar so ga.iiñ

muskurā uThtā huuñ apnī sādgī par maiñ kabhī

kis qadar tezī se ye bāteñ purānī ho ga.iiñ

jhilmila kar bujh gae pagal ummidon ke diye

tu samajhti hai ki main hun aaj tak andohgin

waqt ke hathon ne aaKHir mundamil kar hi diya

ab mere masum zaKHmon se lahu bahta nahin

jab hinai ungliyon ki junbishen aati hain yaad

jazb kar leta hun aankhon ki junbishen aati hain yaad

ab magar mazi ki har shai par andhera chha gaya

aur hi rahon se guzarti ja rahi hai zindagi

zehn mein ubhre hue hain chand be-ja se nuqush

aur un mein bhi nahin hai koi rabt-e-bahami

KHwab dekha tha kisi daman ki chhanw mein kabhi

ek aisa KHwab jis ka muddaa koi nahin

main akela ja raha hun aur zamin hai sanglaKH

ajnabi wadi mein mera aashna koi nahin

raste kaTte hue gum ho gae hain dhund mein

dhund se aage KHala hai rasta koi nahin

ye bhayanak KHwab kyon maghlub karte hain mujhe

dudhiya raaten sahar ke jhuTpuTe mein kho gain

aur teri narm bahen mujh se ab na-ashna

aur hi gardan ke halqe mein lipaT kar so gain

muskura uThta hun apni sadgi par main kabhi

kis qadar tezi se ye baaten purani ho gain