lahren

maiñ sochūñ kaise ye lahrā ke itne paas aatī haiñ

maiñ sochūñ ye namī itnī kahāñ se saath laatī haiñ

sunahrī sub.heñ hoñ pahlū meñ yā phir kattha.ī shāmeñ

usī shiddat se donoñ ko gale apne lagātī haiñ

fazā meñ tairtī hai vaqt kī tasvīr jo korī

ufaq se rang lā kar us ke dāman ko sajātī haiñ

samo leñ yuuñ to saarī anjuman apnī panāhoñ meñ

na jaane sāhiloñ ko chhū ke kyuuñ sharmā sī jaatī haiñ

umaḌ kar chūmtī haiñ bādaloñ kā ruḳh kabhī yuuñ to

kabhī phir chāñd ko āġhosh meñ apne bulātī haiñ

musalsal jāgnā sadiyoñ se jaise in kī fitrat ho

magar ye kashtiyoñ ko apnī chhātī par sulātī haiñ

balā kā dard hai siine meñ in ke jazb muddat se

magar jab dekhiye āñkhoñ hī āñkhoñ muskurātī haiñ

ye sāñsoñ kī tarah haiñ zindagī kā silsila thāme

kabhī suniye agar ye dāstāñ apnī sunātī haiñ

main sochun kaise ye lahra ke itne pas aati hain

main sochun ye nami itni kahan se sath lati hain

sunahri subhen hon pahlu mein ya phir katthai shamen

usi shiddat se donon ko gale apne lagati hain

faza mein tairti hai waqt ki taswir jo kori

ufaq se rang la kar us ke daman ko sajati hain

samo len yun to sari anjuman apni panahon mein

na jaane sahilon ko chhu ke kyun sharma si jati hain

umaD kar chumti hain baadalon ka ruKH kabhi yun to

kabhi phir chand ko aaghosh mein apne bulati hain

musalsal jagna sadiyon se jaise in ki fitrat ho

magar ye kashtiyon ko apni chhati par sulati hain

bala ka dard hai sine mein in ke jazb muddat se

magar jab dekhiye aankhon hi aankhon muskuraati hain

ye sanson ki tarah hain zindagi ka silsila thame

kabhi suniye agar ye dastan apni sunati hain