lahu se namak Tapakta hai

lahū se mere Tapke hai namak āhista āhista

ajab ye raushnī hai jis se har jānib añdherā hai

garm rātoñ ke āñgan se pare merā baserā hai

maiñ apne ḳhālī kamroñ ke dar-o-dīvār se tar huuñ

maiñ apne ḳhvāb meñ rakkhā huā ik ḳhālī bistar huuñ

lahū se mere Tapke hai namak āhista āhista

mujhe hai ilm maiñ huuñ jism ik be-kār saa.e kā

mire alfāz dīvāroñ se lag ke TuuT jaate haiñ

kabhī lamhe ham apne pīchhe chhūT jaate haiñ

lahū se mere Tapke hai namak āhista āhista

mere inkār se hai dard meñ farāvānī

ki jaise hoñ ka.ī sūraj magar phir bhī añdherā ho

tumhārī mehrbānī ye batāo kaun ho tum kyoñ

tumhāre ghar se thoḌā duur haivānoñ kā Derā hai

lahū se mere Tapke hai namak āhista āhista

kabhī ik ret par chaltī huī kashtī kabhī ham haiñ

jo apne bāzuoñ par bāñdh kar patvār chalte haiñ

falak hai yā ki apne sar ke andar phailtā sā kuchh

kabhī is paar chalte haiñ kabhī us paar chalte haiñ

lahū se mere Tapke hai namak āhista āhista

sahar se shaam tak phir sub.h tak āhista āhista

lahu se mere Tapke hai namak aahista aahista

ajab ye raushni hai jis se har jaanib andhera hai

garm raaton ke aangan se pare mera basera hai

main apne KHali kamron ke dar-o-diwar se tar hun

main apne KHwab mein rakkha hua ek KHali bistar hun

lahu se mere Tapke hai namak aahista aahista

mujhe hai ilm main hun jism ek be-kar sae ka

mere alfaz diwaron se lag ke TuT jate hain

kabhi lamhe hum apne pichhe chhuT jate hain

lahu se mere Tapke hai namak aahista aahista

mere inkar se hai dard mein farawani

ki jaise hon kai suraj magar phir bhi andhera ho

tumhaari mehrbani ye batao kaun ho tum kyon

tumhaare ghar se thoDa dur haiwanon ka Dera hai

lahu se mere Tapke hai namak aahista aahista

kabhi ek ret par chalti hui kashti kabhi hum hain

jo apne bazuon par bandh kar patwar chalte hain

falak hai ya ki apne sar ke andar phailta sa kuchh

kabhi is par chalte hain kabhi us par chalte hain

lahu se mere Tapke hai namak aahista aahista

sahar se sham tak phir subh tak aahista aahista