laKHt laKHt

ye TukḌe ye reze ye zarre ye qatre ye reshe

ye merī samajh kī nasīnī ke pādān

inheñ joḌtā huuñ to koī badan

na koī surāhī na sahrā na dariyā na koī shajar kuchh bhī bantā nahīñ

lakīroñ se ḳhāke ubharte haiñ lekin

ye koshish miTā.ī huī sūrateñ phir banātī nahīñ

ki vo jaan jis se ye saarā jahān

harārat se harkat se māmūr thā ab kahāñ hai

merī aql ne sard aahan ke be-jān TukḌoñ ko ālāt kī shakl meñ Dhaal kar

mire toḌne joḌne ke amal meñ lagāyā

jalā kar har ik jism ko phūñk kar jaan ko raakh se apnī zambīl bhar lī

to is raakh se kaise vo sūrateñ phir janam leñ

jinheñ vaqt ne aur maiñ ne miTāyā

ye TukDe ye reze ye zarre ye qatre ye reshe

ye meri samajh ki nasini ke padan

inhen joDta hun to koi badan

na koi surahi na sahra na dariya na koi shajar kuchh bhi banta nahin

lakiron se KHake ubharte hain lekin

ye koshish miTai hui suraten phir banati nahin

ki wo jaan jis se ye sara jahan

hararat se harkat se mamur tha ab kahan hai

meri aql ne sard aahan ke be-jaan TukDon ko aalat ki shakl mein Dhaal kar

mere toDne joDne ke amal mein lagaya

jala kar har ek jism ko phunk kar jaan ko rakh se apni zambil bhar li

to is rakh se kaise wo suraten phir janam len

jinhen waqt ne aur main ne miTaya