lazzat-e-agahi

maiñ ajiib lazzat-e-āgahī se do chaar huuñ

yahī āgahī mirā lutf hai mirā karb hai

ki maiñ jāntā huuñ

maiñ jāntā huuñ ki dil meñ jitnī sadāqateñ haiñ

vo tiir haiñ

jo chaleñ to naġhma sunā.ī de

jo hadaf pe jā ke lageñ to kuchh bhī na bach sake

ki sadāqatoñ kī nafī hamārī hayāt hai

mire dil meñ aisī haqīqatoñ ne panāh lī hai

ki jin pe ek nigāh Dālnā

sūrajoñ ko butūn-e-jāñ meñ utārnā hai

maiñ jāntā huuñ

ki hākimoñ kā jo hukm hai

vo dar-asl adl kā ḳhauf hai

vo sazā.eñ dete haiñ

aur nahīñ jānte

ki jitnī sazā.eñ haiñ

vo sitamgarī kī ridā.eñ haiñ

mujhe ilm hai

yahī ilm merā surūr hai ye ilm merā azaab hai

yahī ilm mirā nasha hai

aur mujhe ilm hai

ki jo zahr hai vo nashe kā dūsrā naam hai

maiñ ajiib lazzat-e-āgahī se do-chār huuñ

main ajib lazzat-e-agahi se do chaar hun

yahi aagahi mera lutf hai mera karb hai

ki main jaanta hun

main jaanta hun ki dil mein jitni sadaqaten hain

wo tir hain

jo chalen to naghma sunai de

jo hadaf pe ja ke lagen to kuchh bhi na bach sake

ki sadaqaton ki nafi hamari hayat hai

mere dil mein aisi haqiqaton ne panah li hai

ki jin pe ek nigah Dalna

surajon ko butun-e-jaan mein utarna hai

main jaanta hun

ki hakimon ka jo hukm hai

wo dar-asl adl ka KHauf hai

wo sazaen dete hain

aur nahin jaante

ki jitni sazaen hain

wo sitamgari ki ridaen hain

mujhe ilm hai

yahi ilm mera surur hai ye ilm mera azab hai

yahi ilm mera nasha hai

aur mujhe ilm hai

ki jo zahr hai wo nashe ka dusra nam hai

main ajib lazzat-e-agahi se do-chaar hun