leo tolstoy

hai jo rāh-e-zindagī meñ pech-o-ḳham kā ik maqām

yā imārat meñ hai jo jāh-o-hasham kā ik maqām

muflisī meñ hai jo fikr-o-ranj-o-ġham kā ik maqām

hai tamaddun meñ vahī ahl-e-qalam kā ik maqām

ye badal dete haiñ dil kī dhaḌkanoñ ko pyaar se

kam nahīñ hotā qalam kā zor kuchh talvār se

hote haiñ ahl-e-qalam hī mulk-o-millat kā nishāñ

daur-e-māzī ke tamaddun kī yahī haiñ dāstāñ

aur daur-e-hāl ke hālāt ke haiñ tarjumāñ

balki kah sakte haiñ in ko qaum ke rūh-e-ravāñ

aa.ina hote haiñ ye millat ke ehsāsāt kā

aur paimāna haiñ goyā mulk ke hālāt kā

tolstoy thā jo duniyā ke adīboñ kā imaam

hind meñ vāqif hai us ke naam se har ḳhās-o-ām

ruus meñ paidā huā thā vo adīb-e-ḳhush-kalām

aur phir duniyā meñ chamkā sūrat-e-māh-e-tamām

thī himāyat us kī hāsil un ko jo mahkūm the

us kī nazroñ meñ the saare mulk jo mazlūm the

jab kiyā tasnīf novel jang aur amn-o-amāñ

ruus ke mazlūm insānoñ kī ḳhūnī dāstāñ

ġhāziyān-e-jang-e-āzādī kā sab likkhā bayāñ

phir diyā paiġhām un ko the jo mīr-e-kārvāñ

naujavānoñ ko diyā ik azm-o-himmat kā payām

un ko samjhāyā ġhulāmī meñ nadāmat kā maqām

haal sab mahkūm mulkoñ kā use ma.alūm thā

hausla un kā baḌhāyā jis qadar mumkin huā

aur un kī kashmakash ko ġhaur se dekhā kiyā

ḳhush huā vo mulk jab bedār koī ho gayā

san satāvan meñ laḌī ham ne jo āzādī kī jang

us se vābasta rahī thī tolstoy kī umang

barbariyat kī añdherī shab meñ parvāna thā vo

sham-e-āzādī pe miT jaane ko dīvāna thā vo

jaḌ hilā dī zulm kī ik aisā mastāna thā vo

jaam azmat ke diye ik pīr-e-mai-ḳhāna thā vo

gorky lenin-o-gāñdhī ne kiyā hai ehtirām

ham 'shifā' us dīda-var ko pesh karte haiñ salām

hai jo rah-e-zindagi mein pech-o-KHam ka ek maqam

ya imarat mein hai jo jah-o-hasham ka ek maqam

muflisi mein hai jo fikr-o-ranj-o-gham ka ek maqam

hai tamaddun mein wahi ahl-e-qalam ka ek maqam

ye badal dete hain dil ki dhaDkanon ko pyar se

kam nahin hota qalam ka zor kuchh talwar se

hote hain ahl-e-qalam hi mulk-o-millat ka nishan

daur-e-mazi ke tamaddun ki yahi hain dastan

aur daur-e-haal ke haalat ke hain tarjuman

balki kah sakte hain in ko qaum ke ruh-e-rawan

aaina hote hain ye millat ke ehsasat ka

aur paimana hain goya mulk ke haalat ka

tolstoy tha jo duniya ke adibon ka imam

hind mein waqif hai us ke nam se har KHas-o-am

rus mein paida hua tha wo adib-e-KHush-kalam

aur phir duniya mein chamka surat-e-mah-e-tamam

thi himayat us ki hasil un ko jo mahkum the

us ki nazron mein the sare mulk jo mazlum the

jab kiya tasnif nowel jang aur amn-o-aman

rus ke mazlum insanon ki KHuni dastan

ghaziyan-e-jang-e-azadi ka sab likkha bayan

phir diya paigham un ko the jo mir-e-karwan

naujawanon ko diya ek azm-o-himmat ka payam

un ko samjhaya ghulami mein nadamat ka maqam

haal sab mahkum mulkon ka use malum tha

hausla un ka baDhaya jis qadar mumkin hua

aur un ki kashmakash ko ghaur se dekha kiya

KHush hua wo mulk jab bedar koi ho gaya

san satawan mein laDi hum ne jo aazadi ki jang

us se wabasta rahi thi tolstoy ki umang

barbariyat ki andheri shab mein parwana tha wo

sham-e-azadi pe miT jaane ko diwana tha wo

jaD hila di zulm ki ek aisa mastana tha wo

jam azmat ke diye ek pir-e-mai-KHana tha wo

gorky lenin-o-gandhi ne kiya hai ehtiram

hum 'shifa' us dida-war ko pesh karte hain salam