log aurat ko faqat jism samajh lete hain

log aurat ko faqat jism samajh lete haiñ

ruuh bhī hotī hai us meñ ye kahāñ sochte haiñ

ruuh kyā hotī hai is se unheñ matlab hī nahīñ

vo to bas tan ke taqāzoñ kā kahā mānte haiñ

ruuh mar jaatī hai to jism hai chaltī huī laash

is haqīqat ko samajhte haiñ na pahchānte haiñ

kitnī sadiyoñ se ye vahshat kā chalan jaarī hai

kitnī sadiyoñ se hai qaa.em ye gunāhoñ kā rivāj

log aurat kī har ik chīḳh ko naġhma samjhe

vo qabīloñ kā zamāna ho ki shahroñ kā rivāj

jabr se nasl baḌhe zulm se tan mel kareñ

ye amal ham meñ hai be-ilm parindoñ meñ nahīñ

ham jo insānoñ kī tahzīb liye phirte haiñ

ham sā vahshī koī jangal ke darindoñ meñ nahīñ

ik bujhī ruuh luTe jism ke Dhāñche meñ liye

sochtī huuñ maiñ kahāñ jā ke muqaddar phoḌūñ

maiñ na zinda huuñ ki marne kā sahārā DhūñDūñ

aur na murda huuñ ki jiine ke ġhamoñ se chhūTūñ

kaun batlā.egā mujh ko kise jā kar pūchhūñ

zindagī qahr ke sāñchoñ meñ Dhalegī kab tak

kab talak aañkh na kholegā zamāne kā zamīr

zulm aur jabr kī ye riit chalegī kab tak

log aurat ko faqat jism samajh lete hain

ruh bhi hoti hai us mein ye kahan sochte hain

ruh kya hoti hai is se unhen matlab hi nahin

wo to bas tan ke taqazon ka kaha mante hain

ruh mar jati hai to jism hai chalti hui lash

is haqiqat ko samajhte hain na pahchante hain

kitni sadiyon se ye wahshat ka chalan jari hai

kitni sadiyon se hai qaem ye gunahon ka riwaj

log aurat ki har ek chiKH ko naghma samjhe

wo qabilon ka zamana ho ki shahron ka riwaj

jabr se nasl baDhe zulm se tan mel karen

ye amal hum mein hai be-ilm parindon mein nahin

hum jo insanon ki tahzib liye phirte hain

hum sa wahshi koi jangal ke darindon mein nahin

ek bujhi ruh luTe jism ke Dhanche mein liye

sochti hun main kahan ja ke muqaddar phoDun

main na zinda hun ki marne ka sahaara DhunDun

aur na murda hun ki jine ke ghamon se chhuTun

kaun batlaega mujh ko kise ja kar puchhun

zindagi qahr ke sanchon mein Dhalegi kab tak

kab talak aankh na kholega zamane ka zamir

zulm aur jabr ki ye rit chalegi kab tak