log kahte hain

log kahte haiñ ki ye aalam hai ik aalam nayā

sāz-e-nau hāthoñ meñ hai paidā hai zer-o-bam nayā

log kahte haiñ ki ab qismat hamāre saath hai

log kahte haiñ ki ab azmat hamāre saath hai

log kahte haiñ ki ab jiddat hamāre saath hai

log kahte haiñ magar kahne se kuchh hotā nahīñ

ye jo aalam hai nigāhoñ meñ nahīñ aalam nayā

haañ magar har ik nafas meñ hai payām-e-ġham nayā

jis ke charche haiñ jahāñ meñ vo masarrat hai kahāñ

log jis azmat pe nāzāñ haiñ vo azmat hai kahāñ

kaun in phūloñ pe qābiz hai vo rāhat hai kahāñ

DhūñDte haiñ dar-ba-dar anjām-e-mehnat hai kahāñ

ye jo aalam hai nigāhoñ meñ nahīñ aalam nayā

zaḳhm gahre haiñ bahut laao koī marham nayā

ġham ke maaro DhūñDh lo ik chāra-sāz-e-ġham nayā

mere dāman meñ nahīñ haiñ tere dāman meñ nahīñ

shāḳh-e-gulshan se jo gul phūTe vo gulshan meñ nahīñ

log kahte hain ki ye aalam hai ek aalam naya

saz-e-nau hathon mein hai paida hai zer-o-bam naya

log kahte hain ki ab qismat hamare sath hai

log kahte hain ki ab azmat hamare sath hai

log kahte hain ki ab jiddat hamare sath hai

log kahte hain magar kahne se kuchh hota nahin

ye jo aalam hai nigahon mein nahin aalam naya

han magar har ek nafas mein hai payam-e-gham naya

jis ke charche hain jahan mein wo masarrat hai kahan

log jis azmat pe nazan hain wo azmat hai kahan

kaun in phulon pe qabiz hai wo rahat hai kahan

DhunDte hain dar-ba-dar anjam-e-mehnat hai kahan

ye jo aalam hai nigahon mein nahin aalam naya

zaKHm gahre hain bahut lao koi marham naya

gham ke maro DhunDh lo ek chaara-saz-e-gham naya

mere daman mein nahin hain tere daman mein nahin

shaKH-e-gulshan se jo gul phuTe wo gulshan mein nahin