london ki ek sham

ye rahguzar

ye zan o mard kā hujūm ye shaam

farāz-e-koh se jis tarah naddiyāñ sar par

liye hue shafaq-ālūd barf ke paikar

safed jhiil kī āġhosh meñ simaT jaa.eñ

ye tund-gām subuk-sair kārvān-e-hayāt

''na ibtidā kī ḳhabar hai na intihā ma.alūm''

kidhar se aa.e kidhar jā rahe haiñ kyā ma.alūm

sunahrī shaam

ye 'e-rose' jhilmilātā huā

bañdhā huā hai nishāna khiñchī huī hai kamāñ

kise ye tiir lagegā

kahāñ? yahāñ ki vahāñ!

nazar nazar se milī dil kā kaam ḳhatm huā

sunahrī shaam

ye 'erose' jagmagātā hai

koī hañse koī ro.e ye muskurātā hai

isī maqām pe phir lauT kar meñ aayā huuñ

ye rahguzar ye zan o mard kā hujūm ye shaam

ye tund-sair subuk-gām kārvān-e-hayāt

ye josh-e-rañg ye Tuġhyān-e-husn ke jalve

yahīñ ke nuur se raushan mirī nigāheñ haiñ

mire shabāb kī roñdī huī ye rāheñ haiñ

vahī maqām hai lekin vahī maqām nahīñ

ye shaam to hai magar vo sunahrī shaam nahīñ

vo ro.ab-dāb nahīñ hai

vo dhūm-dhām nahīñ

vo maiñ nahīñ huuñ

ki un kā maiñ ab ġhulām nahīñ

sanam-kadoñ meñ ujāle nahīñ rahe ki jo the

ki ab vo dekhne vaale nahīñ rahe ki jo the

ye rahguzar

ye zan o mard ka hujum ye sham

faraaz-e-koh se jis tarah naddiyan sar par

liye hue shafaq-alud barf ke paikar

safed jhil ki aaghosh mein simaT jaen

ye tund-gam subuk-sair karwan-e-hayat

na ibtida ki KHabar hai na intiha malum

kidhar se aae kidhar ja rahe hain kya malum

sunahri sham

ye 'e-rose' jhilmilata hua

bandha hua hai nishana khinchi hui hai kaman

kise ye tir lagega

kahan? yahan ki wahan!

nazar nazar se mili dil ka kaam KHatm hua

sunahri sham

ye 'erose' jagmagata hai

koi hanse koi roe ye muskuraata hai

isi maqam pe phir lauT kar mein aaya hun

ye rahguzar ye zan o mard ka hujum ye sham

ye tund-sair subuk-gam karwan-e-hayat

ye josh-e-rang ye Tughyan-e-husn ke jalwe

yahin ke nur se raushan meri nigahen hain

mere shabab ki rondi hui ye rahen hain

wahi maqam hai lekin wahi maqam nahin

ye sham to hai magar wo sunahri sham nahin

wo roab-dab nahin hai

wo dhum-dham nahin

wo main nahin hun

ki un ka main ab ghulam nahin

sanam-kadon mein ujale nahin rahe ki jo the

ki ab wo dekhne wale nahin rahe ki jo the