long distance relationship

maiñ apne shahr-e-tasavvur meñ ek muddat se

jahān-bhar ke masā.il se kaT ke baiThā thā

vabā-e-maut idhar se guzar ke jā bhī chukī

maiñ be-ḳhabar tire ġham se lipaT ke baiThā thā

tū jāntī hai 'azāboñ kī tez bārish se

tire ḳhayāl kī chhat ne bachā.e rakkhā mujhe

jo tere ḳhvāb tirī guftugū mayassar thī

inhīñ asāsoñ ne insāñ banā.e rakkhā mujhe

maiñ mutma.in to bahut thā magar ka.ī din se

shadīd hasrat-e-qurbat kī dhuup aane lagī

maiñ apne shahr-e-tasavvur meñ kitne 'aish se thā

yahāñ bhī talḳh haqīqat mujhe chiḌhāne lagī

maiñ intizār-e-musalsal kā isti'āra nahīñ

tirī nigāh meñ tahrīr honā chāhtā huuñ

jo fāsloñ ne ikaTThā kiye haiñ ġham un par

bilak-bilak ke tire saath ronā chāhtā huuñ

maiñ terī uñglī pakaḌ kar sitāre ginte hue

hinā kā rang ḳhalāoñ meñ bharnā chāhtā huuñ

darīche vā hoñ añdherā ho rāste chup hoñ

maiñ us fazā meñ koī baat karnā chāhtā huuñ

maiñ sub.h-o-shām yahī ḳhvāb buntā rahtā huuñ

ki tū milī to maiñ aise gale lagā.ūñgā

kuchh is tarah tire chehre ko hāthoñ meñ bhar kar

tire laboñ pe laboñ se diye jalā.ūñgā

dabā huā huuñ inhīñ hasratoñ ke bojh tale

ab intizār ke sadme uThā na pā.ūñgā

tū is baras bhī agar mujh se mil nahīñ paa.ī

batā rahā huuñ maiñ andar se TuuT jā.ūñgā

tamām goshe mirī dhuñdlī ziist ke raushan

siyāh raat kī nādāniyoñ se hoñ shāyad

vo mas.ale jo dilāsoñ se hal nahīñ hote

vo tere jism kī 'uryāniyoñ se hoñ shāyad

maiñ jāntā huuñ ki 'uryāniyoñ se baḌh kar hai

jo tere zehn meñ tasvīr hai mohabbat kī

ye bāteñ tujh ko havasnāk lag rahī hoñgī

ki tū ne merī tamanna nahīñ 'ibādat kī

tujhe ye lagtā hai asbāb-e-vasl kuchh bhī nahīñ

badan udāsī pe chilman-numā qabā.eñ haiñ

maiñ jin ko sun ke bahut be-qarār rahtā huuñ

vo mere dil kī nahīñ jism kī sadā.eñ haiñ

ḳhirad ke dā.eroñ meñ qaid ho chukī laḌkī

maiñ terī soch ke hamrāh bah nahīñ saktā

tū kār-e-duniyā meñ masrūf ho ga.ī hogī

par iztirāb-e-judā.ī maiñ sah nahīñ saktā

tirī tamām dalīloñ kī qadr hai lekin

faqat dalīloñ se sab ḳhvāhisheñ nahīñ bhartīñ

badan kī apnī zarūrat hai dil kī apnī talab

guloñ kā kaam kabhī ḳhushbūeñ nahīñ kartīñ

main apne shahr-e-tasawwur mein ek muddat se

jahan-bhar ke masail se kaT ke baiTha tha

waba-e-maut idhar se guzar ke ja bhi chuki

main be-KHabar tere gham se lipaT ke baiTha tha

tu jaanti hai 'azabon ki tez barish se

tere KHayal ki chhat ne bachae rakkha mujhe

jo tere KHwab teri guftugu mayassar thi

inhin asason ne insan banae rakkha mujhe

main mutmain to bahut tha magar kai din se

shadid hasrat-e-qurbat ki dhup aane lagi

main apne shahr-e-tasawwur mein kitne 'aish se tha

yahan bhi talKH haqiqat mujhe chiDhane lagi

main intizar-e-musalsal ka isti'ara nahin

teri nigah mein tahrir hona chahta hun

jo faslon ne ikaTTha kiye hain gham un par

bilak-bilak ke tere sath rona chahta hun

main teri ungli pakaD kar sitare ginte hue

hina ka rang KHalaon mein bharna chahta hun

dariche wa hon andhera ho raste chup hon

main us faza mein koi baat karna chahta hun

main subh-o-sham yahi KHwab bunta rahta hun

ki tu mili to main aise gale lagaunga

kuchh is tarah tere chehre ko hathon mein bhar kar

tere labon pe labon se diye jalaunga

daba hua hun inhin hasraton ke bojh tale

ab intizar ke sadme uTha na paunga

tu is baras bhi agar mujh se mil nahin pai

bata raha hun main andar se TuT jaunga

tamam goshe meri dhundli zist ke raushan

siyah raat ki nadaniyon se hon shayad

wo masale jo dilason se hal nahin hote

wo tere jism ki 'uryaniyon se hon shayad

main jaanta hun ki 'uryaniyon se baDh kar hai

jo tere zehn mein taswir hai mohabbat ki

ye baaten tujh ko hawasnak lag rahi hongi

ki tu ne meri tamanna nahin 'ibaadat ki

tujhe ye lagta hai asbab-e-wasl kuchh bhi nahin

badan udasi pe chilman-numa qabaen hain

main jin ko sun ke bahut be-qarar rahta hun

wo mere dil ki nahin jism ki sadaen hain

KHirad ke daeron mein qaid ho chuki laDki

main teri soch ke hamrah bah nahin sakta

tu kar-e-duniya mein masruf ho gai hogi

par iztirab-e-judai main sah nahin sakta

teri tamam dalilon ki qadr hai lekin

faqat dalilon se sab KHwahishen nahin bhartin

badan ki apni zarurat hai dil ki apni talab

gulon ka kaam kabhi KHushbuen nahin kartin