لکھنؤ

ماضی کی تجلی سے معمور یہ کاشانہ

احساس مسلماں کو کر دیتا ہے دیوانہ

اللہ رے بیدردی طوفان حوادث کی

دنیا میں حقیقت بھی بن جاتی ہے افسانہ

عالم کی نگاہوں سے اترے ہوئے ایوانو

بے ساختہ اشکوں کا حاضر ہے یہ نذرانہ

اب حسن کی محفل میں حسرت سی برستی ہے

وہ غمزۂ ہندی ہیں نے عشوۂ ترکانہ

غم عظمت رفتہ کا سینے میں لیے اپنے

سیاح سے کہتا ہے ہر ذرہ یہ افسانہ

سر لے کے ہتھیلی پر ابھری تھی جو دنیا میں

اس قوم کو لے ڈوبا شغل مے و مے خانہ