luhaar jaanta nahin

hamāre gaañv kā luhār ab darāñtiyāñ banā ke bechtā nahīñ

vo jāntā hai fasl kāTne kā vaqt kaT gayā saroñ ko kāTne ke shaġhl meñ

vo jāntā hai bāñjh ho ga.ī zamīn jab se le ga.e naqāb-posh gaañv ke maveshiyoñ ko shahr meñ

jo barmalā sadā.eñ de ke ḳhushk ḳhuun bechte haiñ be-yaqīn bastiyoñ ke darmiyāñ

udaas dil ḳhamosh aur be-zabāñ kabāḌ ke hisār meñ siyāh ko.eloñ se guftugū

tamām din guzārtā hai sochtā hai koī baat ruuh ke sarāb meñ

kuredtā hai ḳhaak aur DhūñDtā hai chup kī vādiyoñ se surḳh aag par vo zarb

jis ke shor se luhār kī samā.ateñ qarīb thiiñ

bajā.e aag kī lapak ke sard raakh uḌ rahī hai dhūñknī ke muñh se

raakh jis ko phāñktī hai jhoñpaḌī kī ḳhastagī

siyāh chhat ke nā-tavāñ sutūn apne āñkaḌoñ samet pīTte haiñ sar

harārtoñ kī bhiik māñgte haiñ jhoñpaḌī ke baam o dar

jo bhaTTiyoñ kī aag ke harīs the

dhueñ ke dā.eroñ se khīñchte the zindagī

magar ajiib baat hai hamāre gaañv kā luhār jāntā nahīñ

vo jāntā nahīñ ki baḌh ga.ī haiñ saḳht aur tez dhaar ḳhanjaroñ kī qīmateñ

so jald bhaTTiyoñ kā peT bhar de surḳh aag se

hamare ganw ka luhaar ab darantiyan bana ke bechta nahin

wo jaanta hai fasl kaTne ka waqt kaT gaya saron ko kaTne ke shaghl mein

wo jaanta hai banjh ho gai zamin jab se le gae naqab-posh ganw ke maweshiyon ko shahr mein

jo barmala sadaen de ke KHushk KHun bechte hain be-yaqin bastiyon ke darmiyan

udas dil KHamosh aur be-zaban kabaD ke hisar mein siyah koelon se guftugu

tamam din guzarta hai sochta hai koi baat ruh ke sarab mein

kuredta hai KHak aur DhunDta hai chup ki wadiyon se surKH aag par wo zarb

jis ke shor se luhaar ki samaaten qarib thin

bajae aag ki lapak ke sard rakh uD rahi hai dhunkni ke munh se

rakh jis ko phankti hai jhonpaDi ki KHastagi

siyah chhat ke na-tawan sutun apne aankaDon samet piTte hain sar

hararton ki bhik mangte hain jhonpaDi ke baam o dar

jo bhaTTiyon ki aag ke haris the

dhuen ke daeron se khinchte the zindagi

magar ajib baat hai hamare ganw ka luhaar jaanta nahin

wo jaanta nahin ki baDh gai hain saKHt aur tez dhaar KHanjaron ki qimaten

so jald bhaTTiyon ka peT bhar de surKH aag se