ma-baad-ut-tabiat

ġhalat logoñ kī bārish ho rahī hai

paanī kī bajā.e un kī nahūsat baras rahī hai

ek kuttā raat aur din ke darmiyān khaḌā ro rahā hai

ġhalat bārish nahūsat aur kutte kī āvāz se

zindagī ke kisī bhī farsh par sulāne vaalī niiñd lāzim hai

magar niiñd ko to aadmī kī āñkhoñ ke uupar se uThā liyā gayā hai

ya.anī ab qayāmat tak sirf jāgnā hai

aur us ke sivā maidān-e-hashr ho bhī kyā saktā hai

koī nahīñ jāntā ki jānñe se pahle kis ne kitnā jaanā

kis ne azal aur abad ke tūl-o-arz ko jaanā

yā jaane baġhair hī ġhalat zamīn kī ġhalat duniyā meñ ġhalat zindagī guzrī ga.ī

to kyā vo maut thī jo kisī ko zindagī se le jaane ke liye aa.ī yā nahīñ aa.ī

magar ye jo saare manzar kisī nahūsat ne dikhā.e

vo kis naam kī buniyād se shurūa huī

yā shurūa na ho ke kis naam par ḳhatm huī

ḳhatm huī bhī yā nahīñ

jhuuT ne sach se kyā kahā

yā sach ne jhuuT se kyā kahā

hamāre hote hue jo bisāt-e-zindagī uThā dī ga.ī

vo ab kaun bichhā.e

havā ne kabhī koī diyā raushan nahīñ kiyā

hamāre hote hue jo bisāt-e-zindagī uThā dī ga.ī

vo ab kaun bichhā.e

havā ne kabhī koī diyā raushan nahīñ kiyā

to jab ham nahīñ hoñge

phir hamāre banā.e ho.e rāsta par kaun chalegā

mohabbat naam detī hai naam miTātī nahīñ

to ab mohabbat ko mohabbat se ḳhatra lāhaq hai

vahshat se kaho ki vo zarā khiḌkī khol kar dekhe

kahīñ duniyā boliyoñ aur zabānoñ kā malba ho chukī ho aur hameñ pata na chalā ho

kahīñ malbe se DhūñDh DhūñDh ke tarah tarah ke bāzār nikāle aur lagā.e jā rahe huuñ

aur hameñ pata na chalā ho

zarā edison kī ruuh se pūchho

us ke bulb ḳhvāb-gāh aur murda-ḳhāne meñ ba-yak-vaqt kyuuñ raushan hote haiñ

mohabbat jab āvāz banī

to āvāz se boliyāñ aur zabāneñ kab banīñ

kyā zamīn par koī jañg

zamīn ke bāhar laḌī ga.ī

agar nahīñ to kyā zamīn par sātoñ āsmān nāzil hue

agar nahīñ to zamīn par zamīn nāzil huī

ghalat logon ki barish ho rahi hai

pani ki bajae un ki nahusat baras rahi hai

ek kutta raat aur din ke darmiyan khaDa ro raha hai

ghalat barish nahusat aur kutte ki aawaz se

zindagi ke kisi bhi farsh par sulane wali nind lazim hai

magar nind ko to aadmi ki aankhon ke upar se uTha liya gaya hai

yani ab qayamat tak sirf jagna hai

aur us ke siwa maidan-e-hashr ho bhi kya sakta hai

koi nahin jaanta ki jaanne se pahle kis ne kitna jaana

kis ne azal aur abad ke tul-o-arz ko jaana

ya jaane baghair hi ghalat zamin ki ghalat duniya mein ghalat zindagi guzri gai

to kya wo maut thi jo kisi ko zindagi se le jaane ke liye aai ya nahin aai

magar ye jo sare manzar kisi nahusat ne dikhae

wo kis nam ki buniyaad se shurua hui

ya shurua na ho ke kis nam par KHatm hui

KHatm hui bhi ya nahin

jhuT ne sach se kya kaha

ya sach ne jhuT se kya kaha

hamare hote hue jo bisat-e-zindagi uTha di gai

wo ab kaun bichhae

hawa ne kabhi koi diya raushan nahin kiya

hamare hote hue jo bisat-e-zindagi uTha di gai

wo ab kaun bichhae

hawa ne kabhi koi diya raushan nahin kiya

to jab hum nahin honge

phir hamare banae hoe rasta par kaun chalega

mohabbat nam deti hai nam miTati nahin

to ab mohabbat ko mohabbat se KHatra lahaq hai

wahshat se kaho ki wo zara khiDki khol kar dekhe

kahin duniya boliyon aur zabanon ka malba ho chuki ho aur hamein pata na chala ho

kahin malbe se DhunDh DhunDh ke tarah tarah ke bazar nikale aur lagae ja rahe hun

aur hamein pata na chala ho

zara edison ki ruh se puchho

us ke bulb KHwab-gah aur murda-KHane mein ba-yak-waqt kyun raushan hote hain

mohabbat jab aawaz bani

to aawaz se boliyan aur zabanen kab banin

kya zamin par koi jang

zamin ke bahar laDi gai

agar nahin to kya zamin par saton aasman nazil hue

agar nahin to zamin par zamin nazil hui