maal

maiñ ne jab bhī palaT ke dekhā hai

dhund kuchh ā.īne se chhūTī hai

aks kuchh aa.ine meñ ubhre haiñ

maiñ ne dekhā hai ik shikasta par

zindagī se tamām-tar aarī

jaise maazī ho! ahd-e-rafta ho

ek nā-sufta gauhar-e-shaffāf

jaise ik āftāb-e-tāza ho

roz-e-ā.inda, roz-e-fardā ho

ek shāhīn-e-māvarā se pare

ek nikhrī huī fazā-e-basīt

haal ho jaise ahd-e-hāzir ho!

dhund phir ā.īne se lipTī hai

aks dhundlā sā maiñ ne dekhā hai

pech-dar-pech jaal makḌī kaa!

ujlā ujlā saa, vo rupahlā sā

jis ke tāroñ meñ maut pinhāñ hai

ek makkhī hai nīm-jāñ majbūr

jaane kis daur kā ye ḳhāka hai!

jaane kis daur ke tasavvur se

dil mirā kaañp kaañp jaatā hai

main ne jab bhi palaT ke dekha hai

dhund kuchh aaine se chhuTi hai

aks kuchh aaine mein ubhre hain

main ne dekha hai ek shikasta par

zindagi se tamam-tar aari

jaise mazi ho! ahd-e-rafta ho

ek na-sufta gauhar-e-shaffaf

jaise ek aaftab-e-taza ho

roz-e-ainda, roz-e-farda ho

ek shahin-e-mawara se pare

ek nikhri hui faza-e-basit

haal ho jaise ahd-e-hazir ho!

dhund phir aaine se lipTi hai

aks dhundla sa main ne dekha hai

pech-dar-pech jal makDi ka!

ujla ujla sa, wo rupahla sa

jis ke taron mein maut pinhan hai

ek makkhi hai nim-jaan majbur

jaane kis daur ka ye KHaka hai!

jaane kis daur ke tasawwur se

dil mera kanp kanp jata hai